ساعىنتايەۆ ۇكىمەت مۇشەلەرىنە ناقتى تاپسىرمالار بەردى
ۇكىمەت باسشىسى ەڭ الدىمەن پەنيتەنتسينارلىق مەكەمەلەردىڭ قۇرىلىسىنا جانە ولاردى جاڭعىرتۋعا ينۆەستورلار تارتۋ ءۇشىن ىشكى ىستەر مينيسترلىگىنە ۇلتتىق ەكونوميكا جانە قارجى مينيسترلىكتەرىمەن بىرلەسىپ، ءبىر اپتانىڭ ىشىندە اتالعان مەكەمەلەردە ورىن الىپ وتىرعان جاعدايدى سارالاۋدى تاپسىردى.
سونىمەن قاتار اتالعان مەرزىم ىشىندە ىشكى ىستەر مينيسترلىگى مەملەكەتتىك-جەكەشىلىك سەرىكتەستىك تەتىكتەرى ارقىلى پەنيتەنتسينارلىق مەكەمەلەردى جاڭعىرتۋ بويىنشا ناقتى شەشىمدەر ازىرلەۋى ءتيىس.
«ءبىر ايدان كەيىن ءبىز مەملەكەت باسشىسى الدىندا ەسەپ بەرۋگە ءتيىسپىز. اسقار ۇزاقباي ۇلى (پرەمەر-ءمينيستردىڭ ءبىرىنشى ورىنباسارى ءمامين) باقىلاۋعا الىڭىز»، - دەدى ساعىنتايەۆ.
سونىمەن قاتار ۇكىمەت باسشىسى قارجى ءمينيسترى باقىت سۇلتانوۆقا «استانا-1» ىلكى اقپاراتتىق جۇيەسىن بارلىق مودۋلدەرىمەن سىناقتان وتكىزۋگە تاپسىرما بەردى.
«2018-جىلدىڭ باسىنان ول ىركىلىسسىز جۇمىس ىستەۋى ءتيىس. سونىمەن بىرگە جاڭا كەدەن كودەكسى ورىندالۋى بارىسىندا بيزنەسكە پروبلەما تۋىنداتپاۋى ءۇشىن ونى جۇزەگە اسىرۋ بويىنشا زاڭنامالىق اكتىلەر ازىرلەۋ قاجەت. اسقار ۇزاقباي ۇلى مۇنى دا باقىلاۋدا ۇستاڭىز. سالىق كودەكسى بويىنشا مەملەكەت باسشىسىنا باياندادىق. قىركۇيەكتە ماجىلىسكە ەنگىزەمىز. تيمۋر مۇرات ۇلى (ۇلتتىق ەكونوميكا ءمينيسترى سۇلەيمەنوۆ - رەد.) جوبانى ازىرلەپ، بارلىق ەسكەرتۋلەردى ەسكەرە وتىرىپ قىركۇيەكتە پارلامەنت ماجىلىسىنە ەنگىزۋ كەرەك»، - دەدى پرەمەر-مينيستر.
مۇنان بولەك ساعىنتايەۆ ەنەرگەتيكا مينيسترلىگىنە ۇلتتىق ەكونوميكا مينيسترلىگىمەن بىرلەسىپ، ەلىمىزدىڭ ەلەكتر تاراتۋ جەلىلەرىن ۇلكەيتۋ ۇدەرىسىن باستاۋدى تاپسىردى.
«2018-جىلدىڭ 1- توقسانىنىڭ قورىتىندىسى بويىنشا جۇرگىزىلگەن جۇمىستار جايىندا ەسەپ بەرىلسىن. سونىمەن قاتار ۇلتتىق ەكونوميكا مينيسترلىگىنە اكىمدەرىمەن بىرلەسىپ يەسىز ەلەكتر جەلىلەرىنە تۇگەندەۋ جۇرگىزۋدى جانە 20- قازانعا دەيىن ولاردى اكىمدىكتەردىڭ بالانسىنا بەرۋ بويىنشا تىڭعىلىقتى جوسپاردى ۇسىنۋدى تاپسىرامىن»، - دەدى ول.
اۆتور: مارلان جيەمباي