باۋىرلارىمىزدى اتاجۇرتىنىڭ بۇگىنگى كەلبەتىن كورسىن دەپ ەكسپوعا وراي شاقىردىق - ەلباسى

«قۇرىلتاي بالامالى ەنەرگيا بويىنشا جەر ءجۇزىنىڭ يننوۆاتسيالىق جەتىستىكتەرىن پاش ەتەتىن ەكسپو-2017 كورمەسىنە وراي وتۋدە. ءبىز ادەيى وسىلاي بايلانىستىردىق. سەبەبى بۇل قازاقستاننىڭ مەرەيىن اسىرىپ، كۇللى الەمنىڭ نازارىن اۋدارىپ وتىرعان ۇلكەن شارا. ءبىز قانداس باۋىرلارىمىز اتاجۇرتىنىڭ بۇگىنگى كەلبەتىن كورىپ، مارقايسىن، وي ءتۇيسىن دەپ سىزدەردى ەكسپوعا وراي شاقىردىق. بار بولعانى 15 جىلدىڭ ىشىندە بوي كوتەرىپ، دۇنيەنى تاڭقالدىرعان ەلوردامىز - استانانىڭ ءوسىپ-وركەندەپ جاتقانىن كورسىن، قۋانسىن دەپ ويلادىق. كەشە جاڭادان سالىنعان تەاتردا بولدىڭىزدار، قازاقستاننىڭ مارقايعان، كوركەيگەن استاناسىن كوردىڭىزدەر، ءالى دە اسپاي، ساسپاي، ەلگە كەلىپ، اۋناپ-قۋناپ، ءبىراز كورىپ قايتىڭىزدار»، - دەدى پرەزيدەنت قۇرىلتايدىڭ اشىلۋ سالتاناتىندا.

سونىمەن قاتار مەملەكەت باسشىسى تاۋەلسىزدىكتىڭ باستاپقى جىلدارىندا بارشا قازاق جۇرتى قانداي قيىنشىلىقتاردى باستان كەشكەنىن ەسكە الدى.

«العاشقى قۇرىلتايدان بەرى، مىنەكەي، 25 جىل ءوتتى، بارلىعى دا مەنىڭ ەسىمدە. ادام باستان كەشپەگەن قيىندىقتاردى كوردىك، XX عاسىردا قازاقتىڭ باسىنان وتپەگەن زۇلمات جوق. ءبىراق تاۋەلسىزدىك جىلدارىندا دا وڭاي قيىن كەزدەر بولعان جوق. رەسەي پاتشالىعى مەن كەڭەس وداعىنىڭ قولاستىندا 150 جىلدان اسا بودان بولدىق. ءتۇرلى زوبالاڭداردى باستان وتكەردىك. تاۋەلسىزدىكتىڭ العاشقى جىلدارىندا ەكونوميكامىز تۇرالاپ، 2 ميلليون حالىق جۇمىسسىز بوسىپ قالدى. نە جالاقى، نە زەينەتاقى تولەي الماي، تاقىرعا وتىرىپ قالعان كەزدەر بولدى. دەگەنمەن، كۇللى قازاقتىڭ جۇمىلا جۇدىرىق بولىپ بىرىگىپ، ەل بولىپ جۇمىس ىستەۋىنىڭ ارقاسىندا كەلەلى، ۇلكەن تابىستارعا قول جەتكىزدىك. جالپى ورتاشا دەڭگەيدە ءومىر سۇرەتىن حالىقتاردىڭ كورسەتكىشىنە قول جەتكىزدىك. 40 پروتسەنتتىك كەدەيشىلىكتى 3 پروتسەنتكە دەيىن تومەندەتتىك. تاۋەلسىزدىك جىلدار ىشىندە ەكونوميكامىزدى 22 ەسە وسىردىك. ەلدىڭ تابىسى دا 20 ەسە ارتتى. بۇگىنگى قازاقتىڭ جاعدايى، ءومىرى، تۇرمىسى ەش ۋاقىتتا قازاق تاريحىندا بولعان ەمەس. بۇل تاريح تۇرعىسىنان قاس-قاعىمدىق ءسات دەپ ايتۋعا بولادى، ءبىراق تۇتاس داۋىرگە تاتيتىن ءداۋىر بولدى دەپ ايتاتىنىمىز وسى. ەلىمىزدىڭ بولاشاققا باستار باعىتى مەن ماقساتى دا ايقىن»، - دەپ قورىتتى ويىن ەلباسى.

ايتا كەتەيىك، استانا قالاسىندا دۇنيەجۇزى قازاقتارىنىڭ V قۇرىلتايى ءوز جۇمىسىن باستاعان بولاتىن. قۇرىلتاي جۇمىسىنا بارلىعى 800 دەلەگات پەن قوناق قاتىسۋدا، ونىڭ 350 ءى الىس جانە جاقىن شەتەلدەردەگى الەمنىڭ 39 ەلىنەن كەلدى. بۇل - عىلىمي-شىعارماشىلىق جانە پەدوگوگيكالىق زيالىلار وكىلدەرى، بيزنەس، سپورت، بۇقارالىق اقپارات قۇرالدارى سالالارىنىڭ ماماندارى، مەملەكەتتىك جانە قوعامدىق ۇيىمداردىڭ قىزمەتكەرلەرى. قۇرىلتاي دەلەگاتتارى مەن قوناقتارىنىڭ 80 پايىزى مۇنداي ءىس-شاراعا العاش رەت قاتىسۋدا. دۇنيەجۇزى قازاقتارىنىڭ قۇرىلتايىنىڭ باسپا ءسوز ورتالىعىندا 150 وتاندىق جانە شەتەلدىڭ ب ا ق وكىلدەرى اقپارات تاراتۋدا.

1992-جىلدان بەرى وتكىزىلىپ كەلە جاتقان قۇرىلتاي دۇنيەجۇزىنىڭ تۇكپىر-تۇكپىرىندە تۇراتىن ەتنيكالىق قازاقتاردىڭ كەزدەسۋ ورنى ءارى بىرەگەي سۇقبات الاڭى بولىپ تابىلادى.