استانادا پرەزيدەنتتىڭ توراعالىعىمەن شەتەل ينۆەستورلارى كەڭەسىنىڭ وتىرىسى وتۋدە

 بۇل جولعى كەڭەسكە قاتىسۋشىلار «بولاشاق ەنەرگياسى» تاقىرىبىن قاۋزاماق. القالى جيىن بارىسىندا ق ر ينۆەستيتسيالار جانە دامۋ ءمينيسترى جەڭىس قاسىمبەك، ەنەرگەتيكا ءمينيسترى قانات بوزىمبايەۆ، ەۋروپالىق قايتا قۇرۋ جانە دامۋ بانكى پرەزيدەنتى سۋما چاكرابارتي، «GE Oil & Gas» كومپانياسىنىڭ باس ديرەكتورى لورەنتسو سيمەنەللي، «ەني» كومپانياسىنىڭ باس اتقارۋشى ديرەكتورى كلاۋديو دەسكالسي، ازيا دامۋ بانكىنىڭ ۆيتسە- پرەزيدەنتى ديۆاكار گۋپتا جانە باسقالارى ءسوز سويلەيدى دەپ كۇتىلۋدە.

 ەستە بولسا، وتكەن جىلدىڭ 26 - مامىرىندا وتكەن شەتەل ينۆەستورلارى كەڭەسىنىڭ 29- وتىرىسىندا ەلباسى نۇرسۇلتان نازاربايەۆ ۇيىمنىڭ كەلەسى مەرەيتويلىق 30- وتىرىسىن «ەكسپو-2017» كورمەسى الاڭىندا وتكىزۋدى ۇسىنعان بولاتىن.

«قازاقستان ءۇشىن تاياۋ ونجىلدىقتاعى باستى مىندەت - دامىعان 30 ەلدىڭ قاتارىنا كىرۋ ستراتەگيالىق ماقساتىنا قول جەتكىزۋگە مۇمكىندىك بەرەتىن ەكونوميكالىق دامۋدىڭ مۇلدەم جاڭا مودەلىن قۇرۋ. بىزگە جۇيەلى شارالار قابىلداۋ قاجەت، ءبىز ونىمەن اينالىسىپ تا جاتىرمىز. جەكە سەكتوردىڭ باسىمدىق رولىمەن ادامي كاپيتالدى دامىتۋداعى ەلدىڭ باسەكەلەستىكتى باسىمدىعىن بارىنشا پايدالانۋ دا كەرەك شىعار. ءبىز مۇنىمەن اينالىساتىن بولامىز. دەگەنمەن، ءبىز «ەكسپو-2017» اۋماعىندا ورنالاساتىن «استانا» حالىقارالىق قارجى ورتالىعى تاقىرىبىن تالقىلاعاندىقتان كەلەسى وتىرىستى «جاڭا ەنەرگيا» دەپ اتاپ، ونى كورمەنىڭ اشىلۋى كەزىندە سول تەرريتوريادا وتكىزۋدى ۇسىنامىن»، - دەگەن ەدى ن. نازاربايەۆ.

ايتا كەتەيىك، شەتەل ينۆەستورلارى كەڭەسى قازاقستان پرەزيدەنتىنىڭ توراعالىعىمەن وتەتىن كەڭەسشى- كونسۋلتاتيۆتى ورگان بولىپ سانالادى. كەڭەس 1998 -جىلى ەلدەگى ينۆەستيتسيالىق قىزمەت پەن ينۆەستيتسيالىق احۋالدى جاقسارتۋمەن تىكەلەي بايلانىستى وزەكتى ماسەلەلەردى ءتيىمدى شەشۋ ءۇشىن مەملەكەت پەن شەتەلدىك ينۆەستورلار اراسىنداعى تىكەلەي ءۇنقاتىسۋدى قامتاماسىز ەتۋ ماقساتىندا قۇرىلعان. ەلدىڭ ينۆەستيتسيالىق ساياساتى مەن ەكونوميكالىق دامۋىنىڭ باستى اسپەكتىلەرى بويىنشا قازاقستان پرەزيدەنتى مەن ۇكىمەتىنىڭ قاراۋىنا ۇسىنىمدار مەن ۇسىنىستاردى ازىرلەۋ كەڭەستىڭ باستى مىندەتى سانالادى.

 اۆتور: مارلان جيەمباي