نۇرسۇلتان نازاربايەۆ فينلياندياعا شاقىرتۋ الدى

ەكى ەلدىڭ پرەزيدەنتتەرى فينليانديانىڭ ۇلتتىق پاۆيلونىنداعى ەكسپوزيتسيالارمەن تانىسىپ، «نۇر الەم» كەشەنىندە ورنالاسقان قازاقستاننىڭ كورمە پاۆيلونىن ارالاپ كوردى. سونداي-اق، مەملەكەتتەر باسشىلارى كورمە كەشەنىنىڭ كونگرەسس-ورتالىعىندا ەكىجاقتى كەلىسسوز جۇرگىزدى.

نۇرسۇلتان نازاربايەۆ س. نيينيستەگە ەلىمىزگە ساپارمەن كەلىپ، فينليانديا پاۆيلونىن اشۋعا قاتىسقانى ءۇشىن العىس ايتىپ، ەكى ەل اراسىنداعى قارىم-قاتىناستىڭ جوعارى دەڭگەيدە ەكەنىن اتاپ ءوتتى.

- ءبىزدىڭ قارىم-قاتىناسىمىز - ۇلگى ەتۋگە تۇرارلىق. ءبىز بىرنەشە رەت ءتۇرلى الەمدىك باس قوسۋلاردا جۇزدەستىك. فينليانديا «ەكسپو-2017» كورمەسىن وتكىزۋ ورنىن تاڭداپ، سونداي-اق ب ۇ ۇ قاۋىپسىزدىك كەڭەسىنىڭ تۇراقتى ەمەس مۇشەسى مارتەبەسىن الۋ كەزىندە بىزگە قولداۋ ءبىلدىردى.

قازاقستان دا حالىقارالىق ارەنادا فينليانديانى ءاردايىم قولداپ كەلەدى، - دەدى مەملەكەت باسشىسى. قازاقستان پرەزيدەنتى ەكىجاقتى بايلانىستاردى دامىتۋدىڭ ماڭىزدىلىعىنا توقتالىپ، ونەركاسىپ، فارماتسيەۆتيكا، اقپاراتتىق تەحنولوگيالار، ءبىلىم جانە مەديتسينا سياقتى سالالارداعى قارىم-قاتىناستى نىعايتۋعا مۇددەلى ەكەنىمىزدى ايتتى.

س. نيينيستە نۇرسۇلتان نازاربايەۆقا كەزدەسۋدىڭ ۇيىمداستىرىلعانى ءۇشىن ريزاشىلىق ءبىلدىرىپ، قازاقستاننىڭ جاھاندىق جانە وڭىرلىك وزەكتى ماسەلەلەردى شەشۋدەگى رولىنە توقتالدى.

- ءسىزدىڭ ەكىجاقتى قارىم-قاتىناس ماسەلەلەرىنە عانا ەمەس، سونىمەن بىرگە جاھاندىق پروبلەمالارعا قاتىستى پىكىرىڭىز دە مەن ءۇشىن ءاردايىم ماڭىزدى. قازىر بۇكىل الەم قازاقستاندا ءوتىپ جاتقان كەلىسسوزدەرگە كوز تىگىپ وتىر.

بۇل - استاناداعى سيرياعا قاتىستى كەلىسسوزدەر، - دەدى فينليانديا پرەزيدەنتى. س. نيينيستە مەملەكەت باسشىسىنا ۇلتتىق پاۆيلونمەن تانىسقانى ءۇشىن العىس ايتىپ، فينلياندياعا ساپارمەن كەلۋگە شاقىردى.