قىتايلىق اۆتوتۋريستەردىڭ العاشقى لەگى قازاقستان شەكاراسىنان ءوتتى
كەرۋەن استاناداعى ەكسپو-2017 شاراسىنا بەت الدى، دەپ حابارلايدى قازاقپارات ءتىلشىسى.
18 اۆتوتۋريست 5 اۆتوۇيمەن الماتى وبلىسى، بالقاش، قاراعاندى، كوكشەتاۋ، شۋچينسك- بۋراباي، شىعىس قازاقستان وبلىستارىن كەسىپ وتەدى.
قىتايلىقتاردىڭ كەرۋەنى قازاقستانعا كەلۋى كەدەندىك راسىمدەۋلەردىڭ جەڭىلدەتىلگەنىن كورسەتەدى.
«بۇرىن توپپەن كەلەتىن تۋريستەردى كىرگىزە المايتىنبىز. ويتكەنى، ولاردىڭ ءارقايسىسىنا بولەك ۆيزا تولتىرۋ كەرەك بولاتىن. 200 ادامنىڭ ءارقايسىسىن تولتىرىپ وتىرۋ مۇمكىن ەمەس. ەندى ءبىز تۋريستەر توبىنا ارنالعان ۆيزا راسىمدەي الامىز. مىسالى، بۇگىن مىنا توپتى ءبىز 2 ساعاتتا راسىمدەپ بولدىق. مۇنىڭ بارلىعى قازاقستاننىڭ تۋريستىك الەۋەتىن ارتتىرۋعا كومەكتەسەدى. بيىلدىڭ وزىندە 400-500 اۆتوموبيل كەلەدى دەپ وتىرمىز»، - دەدى كومپانيا ديرەكتورى ايا قۇسايىنوۆا.
قىتاي تۋريستىك نارىعىندا جىلدا 5 ميلليونعا جۋىق ادام اۆتوۇيلەرمەن ساياحاتتايدى. قالالىق تۋريزم جانە سىرتقى بايلانىس باسقارماسىنىڭ مالىمدەۋىنشە، مۇنداي تۋريستىك مارشرۋتتار ارنايى كەمپينگتەر مەن ۇلكەن اۆتوتۇراق ينفراقۇرىلىمىن تالاپ ەتەدى. الماتى اكىمدىگى مەملەكەتتىك جەكەمەنشىك ارىپتەستىك اياسىندا اۆتوۇيلەرگە ارنالعان اۆتوتۇراق جاساۋدى قولعا الماق.
اۆتور: گۇلميرا عوسمانالي
