سولتۇستىك كورەيانىڭ يادرولىق پروبلەماسىن رەتتەۋ كەلىسسوزىنىڭ قايتا جاڭعىرۋىن جاقتايمىز - ەلباسى
بۇل تۋرالى بۇگىن ەلوردادا ءوتىپ جاتقان ش ى ۇ- عا مۇشە مەملەكەتتەر باسشىلارى كەڭەسىنىڭ كەڭەيتىلگەن وتىرىسىندا ق ر پرەزيدەنتى نۇرسۇلتان نازاربايەۆ ايتتى، دەپ حابارلايدى قازاقپارات.
«قازاقستان 2017-2018-جىلدارى ب ۇ ۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندە سىزدەرمەن بىرلەسە وتىرىپ، وڭىرلىك جانە جاھاندىق جانجالداردى شەشۋ ءۇشىن بار كۇش-جىگەرىن جۇمسايتىن بولادى. اۋعانستان باسشىلىعىنىڭ اۋعانىشىلىك ساياسي ديالوگتى نىعايتۋ، ەلدى تۇراقتى، دامىعان مەملەكەتكە ترانسفورماتسيالاۋ جونىندەگى كۇش-جىگەرىن تولىقتاي قولدايمىز. بۇل وڭىردەگى بارلىعىمىزدىڭ مۇددەمىزگە ساي»، - دەدى ەلباسى.
سونىمەن قاتار نۇرسۇلتان نازاربايەۆ ەلىمىز استانا پروتسەسى الاڭىندا سيرياارالىق داعدارىستى رەتتەۋ جونىندەگى كەلىسسوزدەر ۇدەرىسىنە ءوزىنىڭ زور ۇلەسىن قوسىپ كەلە جاتقاندىعىن باسا ايتتى.
«بارلىق مۇددەلى تاراپتاردىڭ اتالعان كەلىسسوزدەرىنە جاعداي جاساۋ بارىنشا ماڭىزدى. بۇعان قوسا، قازاقستان يادرولىق قارۋسىزدانۋ جانە تاراتپاۋ يدەياسىن جاقتاۋشى بولىپ سانالادى. وسىعان بايلانىستى ءبىز سولتۇستىك كورەيانىڭ يادرولىق پروبلەماسىن رەتتەۋ بويىنشا كەلىسسوزدەردىڭ تەز ارادا قايتا جاڭعىرۋىن جاقتايمىز»، - دەپ اتاپ ءوتتى مەملەكەت باسشىسى.
ق ر پرەزيدەنتى قازاقستاننىڭ «جاسىل ەكونوميكانى» دامىتۋ جونىندەگى جاھاندىق كۇش-جىگەرگە دە قولداۋ كورسەتەتىندىگىن جەتكىزدى.
«بۇگىن بارلىعىمىز «بولاشاق ەنەرگياسى» ۇرانىمەن «ەكسپو-2017» حالىقارالىق مامانداندىرىلعان كورمەسىنىڭ اشىلۋ سالتاناتىنا قاتىساتىن بولامىز. بارلىقتارىڭىزعا ۇسىنىسىمدى قابىل الىپ، اتالعان شاراعا قاتىسۋعا نيەت بىلدىرگەندەرىڭىز ءۇشىن شىنايى ريزاشىلىعىمدى بىلدىرەمىن.
بىرنەشە اي بويى وسى جەردە ەكولوگيالىق تازا ەنەرگەتيكا سالاسىنداعى ەڭ الدىڭعى قاتارلى تەحنولوگيالار كورسەتىلەتىن بولادى.
استانادا وتەتىن ەكسپو ناتيجەسى ش ى ۇ- نىڭ بارلىق مەملەكەتتەرىنە جانە تولىقتاي العاندا حالىقارالىق قوعامداستىققا ايتارلىقتاي پايدا اكەلەرىنە ءۇمىت ارتامىن»، - دەدى نۇرسۇلتان نازاربايەۆ.
اۆتور: مارلان جيەمباي
