شىمكەنتتە كوك تىرەگەن ءزاۋلىم ۇيلەر بوي كوتەرەدى
جيىندا قىتايلىق «شانحاي كونستراكشن» كومپانياسىنىڭ وكىلدەرى ءوڭىر باسشىسىنا «شىمكەنت سيتي» قالاشىعىنىڭ ماڭىندا سالىناتىن تۇرعىن ءۇي كەشەنىنىڭ جوباسىن تانىستىردى، دەپ حابارلايدى وبلىس اكىمدىگىنىڭ باسپا ءسوز قىزمەتى.
ايتا كەتۋ كەرەك، اتالعان كومپوزيتسيانىڭ ورتالىعى رەتىندە توبەسى كوك تىرەگەن 57 قاباتتان تۇراتىن ەكى كوپقاباتتى ءۇي سالۋ قاراستىرىلۋدا.
«شانحاي-تاۋەر» جانە «شىمكەنت-تاۋەر» دەپ اتالاتىن مۇنارالار اتالعان ەكى قالانىڭ دوستىق سيمۆولى ىسپەتتەس بولماق. جوبانىڭ جالپى كولەمى 300 مىڭ شارشى مەتردەن استام.
قىتايلىق ينۆەستورلاردىڭ ايتۋىنشا، اتالعان تۇرعىن ءۇي كەشەنىن سالۋ يدەياسى شىعىس پەن باتىس كوپەستەرىنىڭ ەجەلگى ساۋدا جولى بولعان ۇلى جىبەك جولىنىڭ تاريحىنا نەگىزدەلگەن.
بۇل جولدىڭ بويىنداعى شاھارلاردىڭ ءبىرى قازىرگى شىمكەنت قالاسى. ال تۇرعىن ءۇي كەشەنىندە ۇلى جىبەك جولىنداعى كونە قالالار - وتىرار، ساۋران، سىعاناق، سايرام، سوزاق اتىمەن اتالاتىن ەجەلگى ورامدار (كۆارتال) سالىنباق.
كاسىپكەرلەرمەن بولعان كەزدەسۋدە وبلىس اكىمى ءوڭىرىمىزدىڭ بۇگىنگە دەيىن جەتكەن جەتىستىكتەرى مەن ينۆەستيتسيالىق مۇمكىندىكتەرىن اتاپ ءوتىپ، اسىرەسە، ايماقتا وتاندىق جانە شەتەلدىك ينۆەستورلار ءۇشىن قولايلى جاعداي جاسالعانىن جەتكىزدى.
مۇنان بولەك، ول اكىمدىكتىڭ اتالعان جوبانى قولدايتىنىن جانە ونى ىسكە اسىرۋدا جان-جاقتى قولداۋلاردىڭ بولاتىنىن ايتتى.
ايتا كەتۋ كەرەك، «شانحاي كونستراكشن» كومپانياسى قىتايداعى قۇرىلىس سالاسىندا ەڭ ۇزدىك كومپانيالاردىڭ وندىعىنا كىرەتىن، وسى سالادا 60 جىلدان استام تاجىريبەسى بار ۇيىم. بۇل كومپانيا ءوز جۇمىسىندا قۇرىلىستان بولەك، نىسانداردى پايدالانۋعا بەرۋ مەن ولاردىڭ ديزاينى بويىنشا، سونىمەن قاتار، كونسالتينگ قىزمەتىمەن اينالىسادى.
