استانادا ەكسپو كادەسىيلارىن ساتاتىن دۇڭگىرشەك اشىلدى
وندا ەكسپو-2017 بەلگىسى باسىلعان ماگنيتتەر، سپورتتىق كيىمدەر، ۇلتتىق باس كيىمدەر، سومكە، قاعاز-قالام سەكىلدى كوپشىلىك تۇتىناتىن تاۋارلاردىڭ 200 دەن استام ءتۇرى ساتىلادى.
«2016-جىلدىڭ تامىز ايىندا رەسمي ليتسەنزياتتاردى ىرىكتەۋ بويىنشا كونكۋرس باستالدى. بۇگىنگە دەيىن 80 گە جۋىق وتىنىمدەر قارالىپ، 26 كومپانيا تاڭداپ الىندى. ولار ەكسپو-2017 كادەسىيلىق جانە يميدجدىك ونىمدەرىنىڭ 200 دەن استام ءتۇرىن وندىرەدى»، - دەدى «استانا ەكسپو-2017» ۇ ك كوممەرتسيالاۋ دەپارتامەنتىنىڭ باس مەنەدجەرى پلاتون كالينيچەنكو.
سونداي-اق، ۇلتتىق كومپانيا وكىلى ليتسەنزيالاۋ باعدارلاماسىن جۇزەگە اسىرۋعا بيۋدجەتتىك قاراجات جۇمسالماعانىن ەرەكشە اتاپ ءوتتى.
«ليتسەنزيالاۋ باعدارلاماسىنا بيۋدجەتتەن قاراجات جۇمسالعان جوق. بارلىق تاۋارلاردىڭ ءوندىرىسى كاسىپكەرلەردىڭ ءوز قارجىسى ەسەبىنەن جۇزەگە اسقان. مەنىڭ ويىمشا، بۇل بيزنەس ءۇشىن دە، ءوز ءىسىن جاڭا باستاعان كاسىپكەرلەر ءۇشىن دە ىڭعايلى پلاتفورما»، - دەدى پ. كالينيچەنكو.
اتالعان دۇڭگىرشەكتەر ازىرگە الماتى قالاسىنداعى اۋەجاي عيماراتىندا، استانا قالاسىنداعى نۇرجول بۋلۆارىندا جانە كەرۋەن ساۋدا ورتالىعىندا جۇمىس ىستەپ تۇر. جاقىن كۇندەرى استانا اۋەجايىنىڭ جاڭا تەرمينالىندا، جاڭا تەمىر جول ۆوكزالىنىڭ عيماراتىندا جانە ەسىلدىڭ جاعالاۋىندا جاڭا نۇكتەلەر اشۋ جوسپارلانعان.
سورەگە ورنالاستىرىلعان بارلىق ونىمدەردىڭ ديزاينى ۇلتتىق كومپانيامەن كەلىسىلەدى.
اۆتور: ايجان سەرىكجان قىزى
