قازاقستاننىڭ بايتاق جەرلەرىن شەتەلدىك رەجيسسەرلەرگە تانىستىراتىن كينوكوميسسيا قۇرىلادى
كانن فەستيۆالىنىڭ قازاقستاندىق پاۆيلونىندا ەۋروپا مەن ازيا كينوكوميسسيالارىمەن وسىنداي كەلىسسوزدەرگە قول جەتكىزىلدى.
ۇلتتىق كينەماتوگرافيا ونەرى جانە عىلىمدارى اكادەمياسىنىڭ پرەزيدەنتى راشيد نۋگمانوۆتىڭ سوزىنە قاراعاندا، جاقىن ارادا قازاقستان حالىقارالىق كينوكوميسسيالار وداعىنا ەنگەن جاعدايدا التاي مەن اتىراۋدىڭ اراسىنداعى ۇلان-عايىر القاپتا شەتەلدىك ءتۇسىرىلىم توپتارىنىڭ سانى ارتۋى كەرەك.
«كانن فەستيۆالىندە ءبىرقاتار ماڭىزدى كەلىسىمدەر جاسالدى. ونىڭ ءبىرى - كينوكوميسسيا قۇرۋ. قازاقستان ءۇشىن بۇل جاڭاشىلدىق، ءبىراق الەمدىك قاۋىمداستىق ءۇشىن ول بۇرىننان بار. بۇل ۇيىم جەرگىلىكتى اكىمشىلىك ورگاندار مەن قازاقستاندا ءتۇسىرىلىم جۇرگىزۋ قىزمەتىن كورسەتەتىن كينەماتوگرافيالىق ۇيىمدارمەن كەلىسىم جاسايدى. ءاردايىم ءبىزدىڭ باي تابيعات، پەيزاجدار مەن كەرەمەت لاندشافتتار تۋرالى ايتامىز. قازاقستانعا ءار جەردەن ءتۇسىرىلىم توپتارىن تارتۋىمىز كەرەك، ءبىراق ول قولىمىزدان ازىرشە كەلمەي وتىر، سەبەبى وسىنداي كينوكوميسسيالاردى قۇرىپ، حالىقارالىق كينوكوميسسيالار وداعىنا كىرۋىمىز شارت. ولار وزدىگىنەن كەلمەيدى، ولارعا ءتۇسىرىلىم جۇرگىزۋگە ساي كەلەتىن ەلدەر ۇسىنىلادى. سوندىقتان ءبىز ەۋروپا مەن ازيا كينوكوميسسيالارىمەن ارىپتەستىك ورناتۋ تۋرالى كەلىسسوزدەر جۇرگىزدىك. قازىر ءبىز مادەنيەت جانە سپورت مينيسترلىگىمەن، اكىمدىكتەرمەن بەلسەندى جۇمىس اتقارۋدامىز. جاقىندا الماتى اكىمدىگىمەن مەموراندۋمعا قول قويۋ جوسپارىمىزدا بار. وسى باستامامىز كەڭ ەتەك السا دەيمىز، سەبەبى قازاقستاننىڭ شىعىسىنان باتىسىنا دەيىن، وڭتۇستىگىنەن سولتۇستىگىنە دەيىن كەرەمەت جەرلەرىمىز بار. ءتۇسىرىلىم توپتارىن ءوز جەرىمىزدە كوپتەپ كورەمىز دەپ ۇمىتتەنەمىن»، - دەدى ول بۇگىن ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
ايتا كەتەيىك، 2017-جىلدىڭ 17-28- مامىر كۇندەرى وتكەن 70- مەرەيتويلىق كانن فەستيۆالىنىڭ اياسىندا وتاندىق كينەماتوگرافيا تاريحىندا العاش رەت قازاقستاننىڭ ۇلتتىق كينوپاۆيلونى اشىلعان بولاتىن.
اۆتور: جاسۇلان جولدىبايەۆ
