شىمكەنتتە ءبىرىنشى سىنىپقا قابىلداناتىن وقۋشىلار مەكتەپكە ەلەكتروندى تۇردە تىركەلەدى

شىمكەنت. قازاقپارات - جىل سايىن وقۋ جىلىن جاڭا باستامامەن قارسى الاتىن مەكتەپ ۇجىمىن بيىل دا وزگەرىستەر كۇتىپ تۇر.

شىمكەنتتە 1- سىنىپقا باراتىن وقۋشىلار ەندى مەكتەپكە ەلەكتروندى تۇردە تىركەلەتىن بولدى. مۇنداي باستاما ەلىمىزدە العاش رەت ەنگىزىلىپ وتىر، دەپ حابارلايدى قازاقپارات ح ا ا ءتىلشىسى.

بۇل جاڭالىقتى ەنگىزۋگە قالالىق ءبىلىم ءبولىمى 8 اي دايىندالىپتى. ياعني، وسى ۋاقىت ارالىعىندا ماماندار ارنايى كومپيۋتەرلىك باعدارلاما ازىرلەپ، اتا-انالار نازارىنا ۇسىنعان.

جاڭا باعدارلاماعا سايكەس، ەندى كەز-كەلگەن اتا-انا ءبىرىنشى سىنىپقا باراتىن بالاسىنىڭ قۇجاتىن كوتەرىپ، تابانىنان توزبايتىن بولادى. ول ءۇشىن ارنايى پورتال جۇمىس ىستەيدى. سول ارقىلى اتا-انا پەرزەنتىنىڭ بولاشاق مەكتەبىنىڭ مەكەن-جايىن، ءبىلىم ساپاسىن، سىنىبىن ءتىپتى، ۇستازعا دەيىن تاڭداي الادى.

ينتەرنەت جەلىسى ارقىلى جۇمىس ىستەيتىن باعدارلاما ۇيدەگى كومپيۋتەر مەن پلانشەتتەرگە جانە قاراپايىم ۇيالى تەلەفونعا وپ-وڭاي كوشىرىلەدى. ەندى جاڭا باستامانى اتا-انالارعا ۇيرەتۋ ءۇشىن ءبىلىم ۇيالارىندا اشىق ەسىك كۇندەرىن وتكىزۋ جوسپارلانىپ وتىر.

«بۇل اتا انالار ءۇشىن وتە ىڭعايلى. سەبەبى، اتا انالار كومپيۋتەر ارقىلى ۇيىندە، ۇيالى تەلەفون ارقىلى، نەمەسە ايپاد، كومپيۋتەر ارقىلى كەز-كەلگەن ورىننان بالالارىنىڭ قۇجاتتارىن تاپسىرىپ، وزدەرى مەكتەپتەرىنە بالالارىن ءبىرىنشى سىنىپقا قابىلداتۋ مۇمكىندىگى تۋىنداتىپ وتىر»، - دەيدى شىمكەنت قالالىق ءبىلىم ءبولىمىنىڭ باسشىسى جانات تاجيەۆا.

ايتا كەتەيىك، بۇگىندە شىم شاھاردا 129 مەكتەپ بار بولسا، ونىڭ 125 دە 21 مىڭ بالا العاشقى مەكتەپ تابالدىرىعىن اتتايدى دەپ كۇتىلۋدە.

بالالاردىڭ ەلەكتروندى قۇجاتىن قابىلداۋ ۋاقىتى 1- ماۋسىمنان 30- تامىزعا دەيىن جۇرگىزىلمەك.