ەلباسى قازاقستان مەن قىتاي ىنتىماقتاستىعىن ۇلگى تۇتارلىق دەپ اتادى - كەسكىن
« ءبىر بەلدەۋ، ءبىر جول» اتتى حالىقارالىق ىنتىماقتاستىق بويىنشا جوعارى دەڭگەيدەگى فورۋمعا قوش كەلدىڭىزدەر. جىبەك جولى ەكونوميكالىق بەلدەۋى باستاماسى قازاقستاندا ۇسىنىلعان. وتكەن جىلى سىزدەر «ۇلكەن جيىرمالىق» كوشباسشىلارىنىڭ سامميتىنە قاتىسۋ ءۇشىن حاڭجوۋ قالاسىنا كەلدىڭىزدەر. وندا ءبىز ءبىرقاتار ماسەلەلەردە تۇسىنىستىككە قول جەتكىزىپ، وڭىرلىك جانە حالىقارالىق ماسەلەلەر بويىنشا تەرەڭنەن پىكىر الماستىق. ءبىزدىڭ ۋاعدالاستىعىمىز ىسكە اسىرىلىپ جاتقانىن قۋانا ايتقىم كەلەدى» ، - دەدى شي جينپيڭ.
ول وندىرىستىك قۋات، ساۋدا- ساتتىق، ەنەرگەتيكا، اۋىل شارۋاشىلىعى جانە باسقا دا سالالارداعى ەكى ەلدىڭ ىنتىماقتاستىعى جوسپارلى دامىپ جاتقانىن اتاپ ءوتتى.
وسى جىلى ءبىز قىتاي مەن قازاقستان اراسىندا ديپلوماتيالىق قاتىناستار ورناۋىنىڭ 25 جىلدىعىن اتاپ وتەمىز. وسى جىلدار ىشىندە ەلدەر اراسىندا ستراتەگيالىق سيپاتتاعى جان- جاقتى بايلانىستار نىعايدى، بۇل بۇدان دا جوعارى دەڭگەيگە جەتەدى دەپ ۇمىتتەنەمىن، - دەدى كەزدەسۋدە شي جينپيڭ.
نۇرسۇلتان نازاربايەۆ شي جينپيڭگە فورۋمعا شاقىرعانى ءۇشىن العىس ءبىلدىردى.
«فورۋمنىڭ اشىلۋىندا سويلەگەن ءسوزىڭىز وتە مازمۇندى، اسەرلى، كوپتەگەن سۇراقتاردىڭ جاۋابى دەسە بولادى. 2013 -جىلى قازاقستاندا ءسىز انتيجاھاندىق ءوسىم اياسىندا الەمدە ادامدار ىنتىماقتاستىقتىڭ قالاي داميتىنى جايلى كوپتەپ سۇراق قوياتىنىن الدىن الا سەزگەندەي، جاڭا باستاما جايلى ويىڭىزدى ءبىلدىردىڭىز. « ءبىر بەلدەۋ، ءبىر جول» باستاماسى وڭىرلىك جانە جاھاندىق دامۋدىڭ جاڭا پاراديگماسى، ىنتىماقتاستىقتىڭ جاڭا سحەماسىنا اينالدى» ، - دەدى ەلباسى.
ن. نازاربايەۆ قازاقستان مەن قىتاي ىنتىماقتاستىعىن ۇلگى تۇتارلىق دەپ اتادى.
«باسقا ەلدەر بىزدەن ۇيرەنۋىنە بولادى. بۇگىن جىبەك جولىنىڭ ەكونوميكالىق بەلدەۋى جۇمىسىن باستاپ تا كەتتى، بيىل ەلدەر اراسىنداعى تاۋار اينالىمىنىڭ ءوسىمى 30 پايىزدى قۇرادى» ، - دەپ اتاپ ءوتتى پرەزيدەنت.
