ق ر پرەزيدەنتى قىتايدا «ءبىر بەلدەۋ، ءبىر جول» فورۋمىنىڭ اشىلۋىنا قاتىسادى
فورۋم تاقىرىبى - «ءبىر بەلدەۋ، ءبىر جول: ورتاق وركەندەۋ جولىنداعى ىنتىماقتاستىق». قىتاي تارابى ونى ق ح ر ءتوراعاسى شي جينپيڭنىڭ ستراتەگيالىق باستامالارىن - «ءبىر بەلدەۋ، ءبىر جول» ءبىرتۇتاس يدەياسىنا بىرىكتىرىلگەن «جىبەك جولىنىڭ ەكونوميكالىق بەلدەۋىن» (2013-جىلدىڭ قىركۇيەگىندە قازاقستاندا ۇسىنىلدى) جانە «21- عاسىردىڭ تەڭىزدىك جىبەك جولىن» (2013-جىلدىڭ قازانىندا يندونەزيادا ايتىلدى) ءىس جۇزىندە ىسكە اسىرۋ ءۇشىن ديالوگ الاڭىنا اينالدىرماق. شارانىڭ كۇن ءتارتىبى ساياسات، كولىك، ساۋدا، قارجى جانە حالىقتاردىڭ ءوزارا بايلانىسى ماسەلەلەرىنە ارنالاتىن بولادى. اتاپ ايتقاندا، ينفراقۇرىلىمدىق بايلانىس، ساۋدا- ەكونوميكالىق ىنتىماقتاستىق، ونەركاسىپتىك ينۆەستيتسيالار، ەنەرگەتيكا جانە رەسۋرستار، قارجىلىق قولداۋ، گۋمانيتارلىق ايىرباس، قورشاعان ورتانى قورعاۋ، تەڭىزدەگى ءوزارا ىنتىماقتاستىق جانە تاعى دا باسقا ماڭىزدى ماسەلەلەر تالقىلانباق. فورۋم پلەنارلىق سەسسيا مەن جوعارى دەڭگەيدەگى پىكىر الماسۋ بولىمدەرىنەن تۇرادى، سونداي-اق مەملەكەتتەر باسشىلارىنىڭ «دوڭگەلەك ۇستەلى» (15- مامىر كۇنى جابىق ەسىك جاعدايىندا) وتەتىنى جوسپارلانۋدا. ق ح ر ءتوراعاسى شي جينپيڭ مەن قازاقستان پرەزيدەنتى نۇرسۇلتان نازاربايەۆپەن بىرگە فورۋم جۇمىسىنا رەسەي (ۆلاديمير پۋتين)، بەلارۋس (الەكساندر لۋكاشەنكو)، قىرعىزستان (المازبەك اتامبايەۆ)، وزبەكستان (شاۆكات ميرزيەيەۆ)، تۇركيا (رەدجەپ تايپ ەردوعان)، ارگەنتينا (ماۋريسيو ماكري)، چيلي (ميشەل باچەلەت)، يندونەزيا (دجوكو ۆيدودو)، ۆەتنام (چان داي كۋانگ)، فيليپپين (رودريگو روا دۋتەرتە)، لاوس (بۋننيانگ ۆوراچيت)، چەحيا (ميلوش زەمان)، شۆەيتساريا (دوريس لويتحارد) ، كەنيا (ۋحۋرۋ كەنياتا) ەلدەرىنىڭ باسشىلارى، سونداي- اق ميانما مەملەكەتتىك حاتشىسى (اۋن سان سۋ چجي)، پاكىستان (ناۆاز شاريف)، ۆەنگريا (ۆيكتور وربان)، گرەتسيا (الەكسيس تسيپراس)، يسپانيا (ماريانو راحوي)، يتاليا (پاولو دجەنتيلوني) كامبودجا (حۋن سەن)، مالايزيا (نادجيب تۋن رازاك)، موڭعوليا (جارگالتۋلگىن ەردەنەبات)، پولشا (بەاتا شيدلو)، سەربيا (الەكساندر ۆۋچيچ)، فيدجا (فرەنك باينيماراما)، شري- لانكا (رانيل ۆيكراماسينگحە) جانە ەفيوپيا (حايلەماريام دەسالەن) پرەمەر-مينيسترلەرى، بارلىعى 29 مەملەكەتتىڭ باسشىلىعى قاتىسادى.
سونداي-اق فورۋم جۇمىسىنا ب ۇ ۇ- نىڭ باس حاتشىسى انتونيۋ گۋتەرريش، دۇنيەجۇزىلىك بانكتىڭ پرەزيدەنتى كيم دجيمەن جانە حالىقارالىق ۆاليۋتا قورىنىڭ ديرەكتورى - باسقارۋشىسى كريستين لاگارد قاتىسادى. فورۋم «ءبىر بەلدەۋ، ءبىر جول» ستراتەگياسى ىسكە اسىرىلا باستاعان ۋاقىتتان بەرگى ونىڭ شەڭبەرىندە وتكىزىلگەن جوعارى دەڭگەيدەگى، سونداي-اق 2017-جىلداعى قىتايداعى ماڭىزدى ساياسي-ديپلوماتيالىق شارا بولماق.
قىتاي باسشىلىعى فورۋس جۇمىسىنىڭ ءتيىستى دەڭگەيدە وتۋىنە ەرەكشە ءمان بەرۋدە. ويتكەنى وسى شارا قورىتىندىسى بويىنشا «ءبىر بەلدەۋ، ءبىر جول» باستامالارىن ىسكە اسىرۋدىڭ باستاپقى قورىتىندىلارى شىعارىلىپ، سونداي-اق ونى ودان ءارى دامىتۋدىڭ جاڭا شارالارى قاراستىرىلىپ، قابىلدانادى.
