ەلباسى وڭتۇستىك كورەيانىڭ جاڭا پرەزيدەنتىن قازاقستانعا شاقىردى
مەملەكەت باسشىسى نۇرسۇلتان نازاربايەۆ مۋن چجە يندى كەزەكتەن تىس پرەزيدەنت سايلاۋىنداعى جەڭىسىمەن قۇتتىقتاپ، وعان زور دەنساۋلىق پەن تابىس، ال دوستاس كورەي حالقىنا بەيبىتشىلىك پەن باق-بەرەكە تىلەدى.
«ءسىزدىڭ كاسىبي بىلىكتىلىگىڭىز بەن ومىرلىك تاجىريبەڭىز وڭتۇستىك كورەيانىڭ ودان ءارى وركەندەۋى مەن دامۋىنا، سونداي-اق ەلدىڭ الەمدىك ارەناداعى ءرولىن ارتتىرا تۇسۋگە مۇمكىندىك بەرەدى دەپ سەنەمىن. بيىل قازاقستان مەن كورەيا اراسىندا ديپلوماتيالىق قارىم-قاتىناس ورناعانىنا 25 جىل تولعانىن اتاپ وتەمىز. ەلىمىز تاۋەلسىزدىك العاننان بەرى استانا مەن سەۋل ىنتىماقتاستىعىنىڭ اياسى جان-جاقتى كەڭەيىپ كەلەدى. ەكىجاقتى قارىم-قاتىناسىمىز الداعى ۋاقىتتا دا ستراتەگيالىق سەرىكتەستىك رۋحىندا دامي بەرەتىنىنە سەنىمدىمىن»، - دەلىنگەن جەدەلحاتتا.
سونداي-اق، نۇرسۇلتان نازاربايەۆ مۋن چجە يندى قازاقستانعا كەلىپ، ەكى ەل اراسىنداعى ءوزارا ءتيىمدى ىنتىماقتاستىقتى نىعايتۋ ماسەلەلەرىن تالقىلاۋعا شاقىردى.
