بۇركىتشى قازاق قىزى تۋرالى فيلم موڭعول كورەرمەندەرىنە جول تارتتى - فوتو
شەتەلدە جارىق كورگەنىنە ءبىراز ۋاقىت وتكەن "The Eagle Huntress" (بۇركىتشى قىز) دەرەكتى فيلمىنىڭ موڭعولياداعى رەسمي تانىستىرىلىمى ايىرىقشا سالتاناتپەن ءوتتى.
«بۇركىتشى قىز» تۋرالى فيلم الەمدىك دەڭگەيدە قۇرمەتكە بولەنىپ ۇلگەرسە دە ەلىمىزدىڭ ازاماتتارىنا تاماشالاۋدىڭ ءساتى جاڭا تۇسكەندەي. بۇركىتشى قىزدىڭ ەرتەگىدەي ومىرىنەن سىر شەرتەتىن اتالمىش تۋىندىنى ەلىمىز كورەرمەندەرىنە ۇسىنۋ ءۇشىن رەسمي رۇقساتتى م ۇ ح مۇشەسى ل. بولد باسقاراتىن «جاڭا موڭعول باستاماسى» بەيرەسمي ۇيىمى ىسكە اسىرعان»، - دەپ جازادى اتالعان اقپارات پورتالى.
فيلمنىڭ ۇلانباتىرداعى بۇل اشىلۋ سالتاناتىنا ايشولپاننىڭ اكەسى نۇرعايىپ، سونداي-اق «بۇركىتشى قىز» كينوسىن جارىققا شىعارۋعا ايتارلىقتاي ۇلەس قوسقان مادەنيەت، سپورت، تۋريزم مينيسترلىگىنىڭ ەكس-باسشىسى س. ويۋۋنگەرەل قاتىستى. شاراعا قاتىسۋشى م ۇ ح مۇشەسى ل. بولد: «ەلىمىزدى عالامعا جارنامالاۋشى «بۇركىتشى قىز» فيلمى ءار موڭعول ازاماتى تامسانىپ تاماشالايتىن فيلمدەردىڭ ءبىرى بولماق»، - دەيدى.
ال موڭعول ەلىنىڭ بۇرىنعى مادەنيەت، سپورت، تۋريزيم ءمينيسترى: «سىزدەر مەن بىزدەر فيلمدى كورۋگە قول جەتكىزىپ وتىرمىز. بۇل فيلم عالامدى تامسانتىپ، ونداعان كينو فەستيۆالدەرىنە قاتىسىپ، ماراپاتتالدى. بۇركىتشى قىز ايشولپان دا ەڭبەگىنىڭ جەمىسىن كورىپ، كينودان تۇسەتىن تابىستان ءوز ۇلەسىن الماق. تىپتەن ول كەيىندە وسى تاقىرىپ اياسىندا جاسالاتىن مۋلتفيلمدەر مەن باسپا ارقىلى شىعاتىن ءاربىر تۋىندىدان ۇلەس الىپ وتىرادى»، - دەگەن جاعىمدى جاڭالىعىن فيلم كورەرمەندەرىمەن ءبولىستى.
قىزىن جاس كۇنىنەن ۇلتتىق ونەرىمىزگە تاربيەلەپ، تالاپتانعان ءجاسوسپىرىمدى ماقساتىنا جەتكىزگەن بۇركىتشى قىزدىڭ اكەسى - نۇرعايىپ بالا تاربيەسىندە باستاپقى قادامنىڭ ماڭىزدى بولاتىنىن ايتتى.
«ءار بالانىڭ ارمانى بولادى. ال سوعان جەتۋ ءۇشىن باستاپقى قادام ماڭىزدى بولماق. مەن ءبۇلدىرشىنىمنىڭ ارمانىنا قۇلاق اسىپ، وعان جەتەتىن العاشقى قادامىنا قولداۋ كورسەتكەن اكەمىن. بالانىڭ ارمانىنا قۇلاق اسىپ، تالابىن ۇشتاپ، ياعني «بەتىنەن قاقپاي، بەلىن بۋسا» قانداي تاڭعاجايىپ جەتىستىككە جەتەتىنىن قىزىم ارقىلى كوز جەتكىزىپ، كەۋدەمدى شاتتىق كەرنەۋدە. ءار اتا-اناعا بالالارىڭىزدىڭ ارمانىنا ءمان بەرىڭىزدەر دەپ ايتقىم كەلەدى»، - دەدى فيلمنىڭ اشىلۋ راسىمىندە ايشولپاننىڭ اكەسى نۇرعايىپ.
قايسار قازاق قىزىنىڭ قاعىلەزدىگى مەن سۇيكىمدى قىلىقتارى، سونداي-اق تاڭعاجايىپ دالا تابيعاتى بەينەلەنگەن دەرەكتى كينو ۇلانباتىرلىق كورەرمەندەردى ءبىرىنشى كورىلىمدە-اق ءتانتى ەتتى.
اۆتور: بەيسەن سۇلتان
