استانادان ءتورت باعىتتا جاڭا اۋە رەيستەرى اشىلادى

استانا. قازاقپارات - مامىر ايىنىڭ ىشىندە ەلوردادان ءتورت باعىتتا جاڭا اۋە رەيستەرى اشىلادى.

بۇل تۋرالى بۇگىن ۇكىمەتتە وتكەن باسپا ءسوز ءماسليحاتىندا ق ر ينۆەستيتسيالار جانە دامۋ ءمينيسترى جەڭىس قاسىمبەك ءمالىم ەتتى، دەپ حابارلايدى قازاقپارات.

«بيىل قاناتقاقتى رەجىمدە استانا ءۇشىن اشىق اسپان ءتارتىبىن ەنگىزدىك، ياعني الەمنىڭ كەز كەلگەن نۇكتەسىنەن اپتاسىنا 7 رەت جيىلىكپەن ءاربىر اۋە كومپانياسى استاناعا باعدارلارىن ۇيىمداستىرا الادى. ءبىز وسى رەجىمدى ەكسپو كەزەڭىنە ەنگىزدىك. ەگەر دە جوبا ءساتتى بولسا، ونى ارى قاراي دا جالعاستىرماقپىز. اعىمداعى ايدىڭ ىشىندە ءتورت باعىتتا رەيستەردى اشۋدىڭ ناقتى جوسپارىن بەلگىلەدىك، وسى ورايدا ۆارشاۆا، حەلسينكي، بۋداپەشت قامتىلماق. بۇعان قوسا «Air China» العاش رەت بەيجىڭنەن استاناعا اۋە ساپارلارىن باستايدى. بۇرىندارى تەك «ەير استانا» عانا ۇشقان بولاتىن»، - دەدى ج. قاسىمبەك.

ونىڭ سوزىنە قاراعاندا، قازىرگى باعدارلارعا اپتاسىنا 11 رەيستىڭ جيىلىگى قوسىلادى. بۇل تۇرعىدا اۋە كومپانيالارى الەمنىڭ ءبىرقاتار ءىرى قالالارىنا رەيستەردى كوبەيتپەك.

«جالپى، ەكسپو كەزەڭىندە قوسىمشا 300 مىڭ شەتەلدىك مەيمانداردى قابىلداي الامىز، وسىعان قازاقستان وڭىرلەرىنەن 160 مىڭ ادام قوسىلادى. جاڭا رەيستەردىڭ، جاڭا اۋەجايدىڭ پايدا بولعانىن ەسكەرە وتىرىپ، جولاۋشىلارعا قىزمەت كورسەتۋدەگى مۇمكىندىكتەر جوعارىلادى»، - دەدى جەڭىس قاسىمبەك.

اۆتور: رۋسلان عابباسوۆ