اليك شپەكبايەۆ مەملەكەتتىك قىزمەتشىلەردىڭ ءجيى اۋىستىرىلۋ سەبەبىن ءتۇسىندىردى
دەپ حابارلايدى «قازاقپارات» ح ا ا ءتىلشىسى.
«ساتىپ الۋلار جانە باقىلاۋ- قاداعالاۋ ورگاندارىندا جۇمىس ىستەيتىن ماماندارمەن قياناتقا بارماۋ جونىندەگى ارنايى كەلىسىمشارتتار جاساسا وتىرىپ، ولاردى ءجيى الماستىرۋ مىندەتىن بەكىتۋ قاجەت. الەمدىك تاجىريبەگە سۇيەنسەك، مەملەكەتتىك قىزمەتشىلەر اراسىندا ءجيى اۋىس- ءتۇيىس جۇرگىزۋ سىبايلاس جەمقورلىققا قارسى شارالاردىڭ ءبىرى بولىپ سانالادى. جەمقورلىقتىڭ جوعارى دارەجەسىنە يە لاۋازىمداردى اتقاراتىن قىزمەتشىلەردى اۋىستىرۋدىڭ قاجەتتىلىگى، قىزمەتشىنىڭ سىبايلاس جەمقورلىق قۇقىق بۇزۋشىلىقتارىنا يتەرمەلەۋى مۇمكىن باقىلاۋ- رۇقسات بەرۋ فۋنكتسيالارىنا ۇزاق ۋاقىت يە بولۋىمەن بايلانىستى. اتالعان شارا مۇنداي قاۋىپ- قاتەرلەرگە جول بەرمەۋگە باعىتتالعان»، - دەپ ءتۇسىندىردى ول «اتامەكەن» ۇ ك پ كاسىپكەرلەر قۇقىعىن قورعاۋ جانە سىبايلاس جەمقورلىققا قارسى ءىس- قيمىل كەڭەسىنىڭ وتىرىسىندا.
ونىڭ ايتۋىنشا، باتىس ەۋروپا ەلدەرىندە روتاتسيا ءار ەكى جىل سايىن، جەمقورلىققا اناعۇرلىم بەيىم سالالاردا جىل سايىن جۇرگىزىلەدى.
بۇعان دەيىن حابارلانعانداي، 2017 -جىلدىڭ ءبىرىنشى توقسانىندا مەملەكەتتىك ساتىپ الۋلار سالاسىندا 73 سىبايلاس جەمقورلىق قىلمىسى تىركەلگەن، ونىڭ 32 ءسى سوتقا جىبەرىلدى. سىبايلاس جەمقورلىققا قارسى قىزمەت دەرەكتەرىنە سايكەس، بۇل سالادا سوتقا تارتىلعاندار سانى 40 پايىزعا ۇلعايعان.
