وزبەكستان پرەزيدەنتى رەسەيدەن مۇناي تاسىمالداۋعا قولداۋ كورسەتكەنى ءۇشىن ەلباسىنا العىس ايتتى

استانا. قازاقپارات - وڭتۇستىك قازاقستان وبلىسىندا قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ وزبەكستان رەسپۋبليكاسىنىڭ پرەزيدەنتى شاۆكات ميرزيەيەۆپەن كەزدەستى،   دەپ حابارلايدى اقوردانىڭ باسپا ءسوز قىزمەتى.

 وزبەكستان پرەزيدەنتىنىڭ قازاقستانعا جۇمىس ساپارى اياسىندا نۇرسۇلتان نازاربايەۆ شاۆكات ميرزيەيەۆپەن كەزدەستى. كەزدەسۋدە وزبەك كوشباسشىسىنىڭ قازاقستانعا بيىلعى ناۋرىز ايىنداعى مەملەكەتتىك ساپارى بارىسىندا ەكى ەل اراسىندا قول جەتكىزىلگەن ۋاعدالاستىقتاردىڭ ىسكە اسىرىلۋ ماسەلەلەرى تالقىلاندى.

مەملەكەت باسشىسى وتكەن كەزدەسۋدەن بەرى ەكى ەل اراسىنداعى ىسكەرلىك بەلسەندىلىك ارتىپ وتىرعانى بايقالاتىنىن اتاپ ءوتتى.

- بيىلعى ءبىرىنشى توقساندا ەكونوميكانىڭ ءتۇرلى سالاسىنداعى ىسكەرلىك ءوزارا قارىم- قاتىناستىڭ دەڭگەيى ارتتى. وسى ورايدا، كولىك- لوگيستيكا سالاسىن، اۆتوونەركاسىپتى، سونداي- اق كەڭ اۋقىمدى ماسەلەلەرگە قاتىستى وڭىرلىك ىنتىماقتاستىقتى اتاپ وتۋگە بولادى. 2017 -جىلعى العاشقى ءۇش ايدا تاۋار اينالىمى 37 پايىزعا ءوستى، - دەدى قازاقستان پرەزيدەنتى. ش. ميرزيەيەۆ تىعىز ەكىجاقتى كەزدەسۋلەر مەملەكەت ارالىق قارىم- قاتىناستىڭ تيىمدىلىگىنە تىكەلەي ىقپال ەتىپ وتىرعانىنا نازار اۋداردى.

 - بيىلعى ناۋرىز ايىنداعى ساپاردان سوڭ ءبىز بىرلەسكەن جۇمىستاردىڭ بارلىق باعىتى بويىنشا جول كارتاسىن قابىلدادىق. مينيسترلەر، وڭىرلەر باسشىلارى دەڭگەيىندەگى كەزدەسۋلەر جيىلەدى، - دەدى وزبەك كوشباسشىسى.

 وزبەكستان پرەزيدەنتى رەسەي فەدەراتسياسىنان مۇناي تاسىمالداۋ ماسەلەسىنە بايلانىستى قولداۋ كورسەتكەنى ءۇشىن نۇرسۇلتان نازاربايەۆقا العىس ايتتى. سوڭىندا ەكى ەل باسشىلارى قازاقستان مەن وزبەكستان اراسىنداعى ىنتىماقتاستىقتىڭ وڭ قارقىنى ساقتالىپ، ودان ءارى دامي بەرەتىنىنە سەنىم ءبىلدىردى.