ەلباسى: ەكسپو قوناقتارى ماڭعىستاۋدىڭ شۇباتىمەن ءشول باسسىن

استانا. قازاقپارات - «ەكسپو» كورمەسىنە كەلەتىن قوناقتار ماڭعىستاۋدىڭ شۇباتىمەن ءشول باسسىن.

مۇنايلى ولكەگە جۇمىس ساپارمەن بارعان ەلباسى جەرگىلىكتى شارۋالارعا وسىنداي تابىستى ماركەتينگ تاسىلدەرىن ويلاستىرۋدى تاپسىردى دەپ حابارلايدى 24.kz.

قارا التىن قورىن جاستانىپ جاتقان ايماق شيكىزاتتىق ەمەس سالانى قولعا السا، تۇيە شارۋاشىلىعىن دامىتىپ، كوكونىس وسىرسە، ءوڭىر باسقا قىرىنان تانىلار ما ەدى دەيدى پرەزيدەنت. دەمەك وسى سالالارعا ينۆەستورلاردى مولىنان تارتىپ، ەل يگىلىگىن بىرلەسە يەگەرەتىن ۋاقىت جەتتى.

جەرگىلىكتى بيلىككە جۇكتەگەن مىندەتتەرىندە مەملەكەت باسشىسى وسى جايتتارعا مۇقيات ءمان بەردى. ەلىمىزدەگى تەڭىزگە شىعاتىن جالعىز ايلاق اقتاۋدا. قازاقستاندى ەۋرازيالىق كولىكتىك-لوگيستيكالىق جانە ىسكەرلىك حاب ەتەتىن دە وسى تەڭىز قاقپاسى بولۋى ءتيىس.

سوندىقتان اقتاۋ حالىقارالىق تەڭىز ايلاعىنىڭ الەۋەتىن كەڭەيتۋ قاشان دا مەملەكەت نازارىندا. سول سەبەپتى پرەزيدەنت ماڭعىستاۋ وبلىسىنا جاساعان جۇمىس ساپارىنىڭ ەكىنشى كۇنىن كاسپي تەڭىزىندەگى كولىك ينفراقۇرىلىمىنىڭ دامۋىن باعامداۋدان باستادى.

نۇرسۇلتان نازاربايەۆ ەلىمىزدىڭ ەكونوميكاسىنا قوماقتى ۇلەس قوسىپ وتىرعان ۇجىممەن جۇزدەسىپ، حال-جاعداي سۇراستى.