نۇرسۇلتان نازاربايەۆ ەلىمىزدە ورىن العان اتىشۋلى جەمقورلىق وقيعالارىنا توقتالدى

استانا. قازاقپارات - ق ر پرەزيدەنتى نۇرسۇلتان نازاربايەۆ وتاندىق تەلەارنالاردان كورسەتىلىپ جاتقان رەسپۋبليكالىق ب ا ق وكىلدەرىنە سۇحباتى بارىسىندا ەلىمىزدە ورىن العان اتىشۋلى جەمقورلىق وقيعالارىنا توقتالدى، دەپ حابارلايدى قازاقپارات.

«جاپ-جاس، بولاشاقتى بىتىرگەن مينيستر ءوزىنىڭ جولداستارىمەن، دوستارىمەن جەمقورلىق توپ قۇرىپ ۇستالدى. قازىر تەرگەۋ امالدارى جۇرگىزىلۋدە. تاياۋدا عانا گەولوگيا كوميتەتىندە دە انىقتالىپ وتىر. ارنايى كوميتەت قۇرعان ەدىك. ويتكەنى قازاقستاننىڭ جەرى قول تيمەستەن جاتىر. اشىلعاندارى، بۇل شاعىن عانا بولىگى. گەولوگتار ىزدەۋ جۇمىستارىمەن اينالىسۋى ءتيىس، سول ءۇشىن كوميتەت قۇرعان ەدىك. ال اتالعان كوميتەت جانە ونىڭ باسشىلىعى بولاشاعى بار كەن ورىندارىن وزدەرىنىڭ تانىستارىنا تاراتىپ بەرە باستاعان. ءبىز مىنا جەردە وتىرىپ، مۇنى قارامايدى دەپ ەشكىم دە ويلاماسىن. مەملەكەتتىك قىزمەتشىلەردى باقىلايتىن كوز كوپ. ادامدار، نانىن قۇردان بوس جەپ وتىرماعان قۇقىق قورعاۋ ورگاندارى قاراپ وتىر»، - دەدى ق ر پرەزيدەنتى.

وسى رەتتە مەملەكەت باسشىسى ۇرلانعان قارجىنىڭ بارلىعى مەملەكەتكە قايتارىلىپ، بۇزۋشىلىقتارعا جول بەرگەندەردىڭ بارلىعى جازالاناتىندىعىن باسا ايتتى. سونىمەن بىرگە مۇنداي زۇلىمدىقپەن بىرلەسە كۇرەسۋ قاجەتتىگىن اتاپ ءوتتى.

«مەملەكەتتە ۇرلىقپەن، پاراقورلىقپەن بىرلەسە كۇرەسەدى. ماسەلەن، سينگاپۋردا مىناداي ءتارتىپ بار: ەگەر ءبىر بولىمدە 10 ادام جۇمىس ىستەپ، ونىڭ ءبىرىنىڭ بىرەۋدەن ءبىر نارسە الۋعا نيەتى بولسا، وندا ونى بىلگەنى ايتۋى ءتيىس. ەگەر ول مۇنى جاساماسا، جازاعا تارتىلادى. ءبىراق، بۇل ءبىز ءۇشىن ەڭ سوڭعى شارا»، - دەدى ەلباسى.

اۆتور: مارلان جيەمباي