پرەزيدەنت كونستيتۋتسيالىق وزگەرىستەردى رەفەرەندۋمعا نە ءۇشىن جىبەرمەگەنىن ءتۇسىندىردى

استانا. قازاقپارات - ق ر پرەزيدەنتى نۇرسۇلتان نازاربايەۆ كونسيتۋتسيالىق رەفورمانى دەپۋتاتتىق كورپۋسقا نە ءۇشىن سەنىپ تاپسىرعانىن ايتىپ بەردى، دەپ حابارلايدى قازاقپارات.

«مەن پارلامەنت دەپۋتاتتارىنان ءبىزدىڭ زاڭنامالار مەن ۇردىستەردى ساقتاي وتىرىپ، كوپكە سوزباي اتالمىش زاڭ جوباسىن قاراستىرۋدى سۇرايمىن"، - دەدى پرەزيدەنت پارلامەنتتىڭ بىرلەسكەن وتىرىسىندا كونستيتۋتسيالىق وزگەرىستەردى مەڭزەپ.

"كونستيتۋتسيانى وزگەرتۋدىڭ ەكى جول بار. پرەزيدەنت تالقىلاۋدان كەيىن وزگەرىستەردى جالپى حالىقتىق رەفەرەندۋمعا جىبەرە الادى نەمەسە پارلامەنت شەشىمىمەن وزگەرتىلەدى. ەلىمىزدىڭ نەگىزگى ساياسي بيلىك جۇيەسى وزگەرىسكە ۇشىرامايتىندىعىن ەسكەرسەك، رەفورما ادامنىڭ نەگىزگى قۇقىقتارى مەن ەركىندىگىنە جاناسپايتىندىقتان، قاراجات پەن ادامي رەسۋرستار شىعىنداپ، رەفەرەندۋم وتكىزۋدىڭ قاجەتتىلىگى شامالى. سوندىقتان حالىق سايلاعان دەپۋتاتتىق كورپۋس كونستيتۋتسياعا سايكەس، اتالعان زاڭداردى ەنگىزۋگە قۇقىلى. سول سەبەپتى مەن ەكىنشى جولدى تاڭدادىم. پارلامەنت ءوزىنىڭ زاڭ شىعارۋ مىندەتىن ابىرويمەن اتقارىپ شىعاتىنىنا سەنىمدىمىن. ءبىزدىڭ ماقساتىمىز ءبىر - مەملەكەتتى باسقارۋ جۇيەسىن ودان ءارى ءتيىمدى، تۇراقتى، قازىرگى زامانعا ساي ەتۋ. ءبىزدىڭ جول - قوعامىمىزدىڭ دەموكراتيالىق دامۋ جولى ەكەنىن تاعى ناقتىلايدى"، - دەدى ەلباسى.

مەملەكەت باسشىسىنىڭ ايتۋىنشا، قازىرگى قازاقستاننىڭ بيلىك جۇيەسىندە ورىن الىپ جاتقان وزگەرىستەر قوعامدى دەموكراتيالاندىرۋدىڭ كەلەسى كەزەڭدەرىنىڭ ءبىرى. سونىمەن قاتار، ەلباسىنىڭ سوزىنشە، اتالمىش وزگەرىستەر قازاقستاننىڭ الەمنىڭ دامىعان 30 مەملەكەتىنىڭ قاتارىنا قوسىلۋىنا دا ءوز ىقپالىن بەرەدى.

 "جاقىن جىلدارى ەكونوميكانىڭ ءوسىمىن% 5  عا جەتكىزۋ قاجەت. 25  جىلدا الەمنىڭ دامىعان 30 ەلدەرىنىڭ قاتارىنا ەنگەن جالعىز ەل بار، ول - وڭتۇستىك كورەيا. سوندىقتان بۇل ءىس سونشالىقتى وڭاي ەمەس. بارلىعى تىرىسۋدا. ءبىز دە سوعان تىرىسامىز. باسەكەلەستىك جاعدايىندا ءبىز قاجەتتى جۇمىستى جاساۋىمىز كەرەك. باسكەلەستىك - ءار ادامنىڭ باسەكەگە قابىلەتتىلىگى. سول سەبەپتى ءبىلىم بەرۋ ساپاسى مەن مامانداردىڭ جوعارى بىلىكتىلىگى وتە ماڭىزدى. ەگەر ۇكىمەتتىڭ قۇرامىن قارايتىن بولساق، ولاردىڭ ورتاشا جاسى شامامەن 40 جاستا، جوعارى ءبىلىمدى، اعىلشىن ءتىلدى، وزگە ەلدەردىڭ تاجىريبەلەرىن يگەرە الاتىن ازاماتتار. ءبىز الەمنىڭ دامىعان 30 مەملەكەتىنىڭ قاتارىنا ەنۋدى ماقسات ەتىپ وتىرمىز. بارلىعىن تەك سول ءۇشىن جاساۋدامىز. ساياسي جانە تەحنولوگيالىق جاڭعىرتۋلار دا سول ماقساتتا قولعا الىنۋدا. ونى ءاردايىم ەستە ساقتاۋ كەرەك"، - دەدى ن. نازاربايەۆ.

 ايتا كەتەيىك، مەملەكەت باسشىسى نۇرسۇلتان نازاربايەۆتىڭ بيلىك تارماقتارى اراسىندا وكىلەتتىكتەردى قايتا ءبولۋ جونىندەگى ۇندەۋىنە وراي كونستيتۋتسيالىق رەفورما باستاماسى جالپى حالىقتىق تالقىلاۋدان ءوتتى. كونستيتۋتسيالىق رەفورمانىڭ ماقساتى - دەموكراتيالىق پروتسەستەردى ىلگەرىلەتۋ ارقىلى مەملەكەتتەگى باسقارۋ جۇيەسىنىڭ تيىمدىلىگىن ارتتىرۋ. وسىنىڭ ارقاسىندا قازاقستانداعى جاعدايدى ودان ءارى جاقسارتۋعا، حالىقتىڭ الەۋمەتتىك- ەكونوميكالىق جاعدايىن كوتەرۋگە مۇمكىندىكتەر تۋاتىن بولادى. بۇنىمەن قوسا، بيلىك تارماقتارى اراسىنداعى تەڭگەرىمدىلىك ساقتالادى. پارلامەنت پەن ۇكىمەت جانە سوت بيلىگى ءوز وكىلەتتىكتەرى اياسىندا، تەڭگەرىمدى جاعدايدا جۇمىس جاسايتىن بولادى.

 

 اۆتور: جاسۇلان جولدىبايەۆ