شاعىن جانە ورتا كاسىپكەرلىكپەن قاي وبلىس ەڭ كوپ اينالىسادى؟

شىمكەنت. قازاقپارات - وڭتۇستىك قازاقستان وبلىسى شاعىن جانە ورتا كاسىپكەرلىكتىڭ سانى بويىنشا وبلىستار اراسىندا ءبىرىنشى ورىندا كەلەدى.

2016-جىلدىڭ قورىتىندىسى بويىنشا، وڭىردەگى كاسىپكەرلىك سۋبەكتىلەرىنىڭ سانى 173770 جەتىپ، ەلدەگى وسى سالاداعى ۇلەستىڭ 14,6 پايىزىن قۇرادى، - دەپ حابارلايدى قازاقپارات ح ا ا ءتىلشىسى.

وبلىستا كاسىپتى دامىتۋ باعىتىندا ءتۇرلى مەملەكەتتىك باعدارلامالار جۇزەگە اسىرىلىپ، قارجى-نەسيەلىك قولداۋ ساياساتى جەتىلدىرىلىپ كەلەدى. وسى قولداۋلاردىڭ ارقاسىندا شاعىن جانە ورتا كاسىپكەرلىك سانى مەن ولارمەن وندىرىلەتىن ونىمدەردىڭ كولەمى ارتۋدا. ماسەلەن، وتكەن جىلدىڭ توعىز ايىندا شاعىن جانە ورتا كاسىپكەرلىك سۋبەكتىلەرىمەن وندىرىلگەن ءونىم كولەمى 627,6 ميلليارد تەڭگەنى قۇراپ، 2015-جىلدىڭ ءتيىستى كەزەڭىمەن سالىستىرعاندا 44 ميلليارد تەڭگەگە نەمەسە %7,5 عا وسكەن.

قىزمەت كورسەتۋ ورتالىعى ءبىر جىل ىشىندە وڭىردەگى شاعىن جانە ورتا بيزنەستىڭ دامۋىنا ۇلەسىن قوسىپ وتىرعان 37232 كاسىپكەرگە كومەك كورسەتتى. سونىمەن قاتار، ءوز ءىسىن باستايمىن دەگەن 2339 ازاماتقا «جۇمىسپەن قامتۋ-2020» باعدارلاماسى اياسىندا قارجىلاي (6,6 ميلليارد تەڭگە) قولداۋ كورسەتىلدى.

«بيزنەستىڭ جول كارتاسى-2020» بيزنەستى قولداۋ مەن دامىتۋدىڭ ءبىرىڭعاي باعدارلاماسى ىسكە اسىرىلعالى بەرى جالپى قۇنى 628,3 ميلليارد تەڭگەنى قۇرايتىن 1300 جوبا ماقۇلدانىپ، 17981 جۇمىس ورنى اشىلدى. ونىڭ ىشىندە، 2016-جىلى 146,2 ميلليارد تەڭگەگە 303 جوبا ىسكە قوسىلىپ، 2126 جۇمىس ورنى قۇرىلدى.

ال، كاسىپكەرلىكتى قولداۋ ماقساتىندا، «وڭتۇستىك» ايماقتىق ينۆەستيتسيالىق ورتالىعى جوبالاردى %7 مولشەرىندە نەسيەلەندىرۋدە. اۋىلدار مەن شالعايداعى ەلدى مەكەندەردەگى كاسىپكەرلىكتى قولدايتىن ورتالىق 2016-جىلى 7,4 ميلليارد تەڭگەنى قۇرايتىن اۋىل شارۋاشىلىعى باعىتىنداعى 2024 جوبانى قارجىلاندىرعان. ناتيجەسىندە 1635 تۇراقتى جانە 3 مىڭعا جۋىق ماۋسىمدىق جۇمىس ورىندارى اشىلدى.

اۆتور: اينۇر اقبايەۆا