قايرات ءمامي قازاقشا بىلمەيتىن پاۆلودار وبلىسىنىڭ سۋديالارىنا شۇيلىكتى

استانا. قازاقپارات - جوعارعى سوت ءتوراعاسى قايرات ءمامي پاۆلودار وبلىستىق سوتى ءتوراعاسى مۇحتار سماعۇلوۆتىڭ جۇمىسىن سىنعا الدى، دەپ حابارلايدى قازاقپارات.
None
None

 «پاۆلودار وبلىسىنىڭ اۋىلدارى مەن اقسۋ قالاسىندا تۇراتىن ءبىر توپ ازامات جوعارعى سوت پەن ورتالىق مەملەكەتتىك ورگاندارعا ارىز- شاعىمداردى ءۇيىپ تاستادى. جوعارعى سوتتىڭ وزىنە 20 عا تارتا شاعىم كەلدى. سونىڭ ىشىندە پرەزيدەنت اكىمشىلىگىنە كەلگەن ارىزدار دا بار. مەملەكەت باسشىسىنىڭ اتىنا بىرنەشە رەت ارىزدانىپ كەلگەن. باستى سەبەپ مۇتكەنوۆ اۋىلىنداعى قاريالاردىڭ داۋ- دامايى بولىپ وتىر»، - دەدى ءمامي.

ماسەلە ولاردىڭ ورىس ءتىلىن تۇسىنبەيتىندىگىندە، ال قازاق ءتىلىن بىلەتىن سۋديا وبلىستا جوق بولىپ شىققان.

«اۋداندا ەكى سۋديا بار، ەكەۋى دە ورىس ءتىلدى، قازاقشالارى ساۋاتسىز. وبلىستىق سوت ءتوراعاسى سماعۇلوۆ جازۋ بىلە ما، وقي الادى ما؟ بار ما ءوزى؟ ءتىرى ما ول؟ دەگەن حاتتار لەگى تاۋسىلار ەمەس»، - دەدى ول تۇرعىنداردىڭ حاتىن كەلتىرىپ.

وسىدان سوڭ، جوعارعى سوت ءتوراعاسى وڭىردەگى سوت ءتوراعالارىنا حالىقپەن تىعىز جۇمىس جاساۋدى ەسكەرتتى.

 «جەكە قابىلداۋ وتكىزۋگە بولماي ما؟ اۋىلدىڭ 70 تەگى قارتتارىمەن وسى شيەلەنىستى شەشۋ مۇمكىن ەمەس پە؟ اكىمدىكتەرمەن، ماسليحاتتارمەن، قازاقستان حالقى اسسامبلەياسىمەن مەموراندۋم نە ءۇشىن جاسالدى؟ مەدياتسيانى نە ءۇشىن ەنگىزدىك؟ ماسەلەنى جەكە شەشۋگە بولماسا، اكىمدىكتەرمەن بىرگە كۇش بىرىكتىرۋ قاجەت. جەرگىلىكتى اقساقالداردى كوتەرىڭىزدەر. وزدەرىڭ قازاقشا سويلەي الماساڭدار، سىزدەردىڭ قازاق ءتىلىن بىلەتىن ورىنباسارلارىڭ، قول استىنداعى سۋديالارىڭ بار. بۇل جۇمىس سىزدەردە ورىندالماعان. ەندى الدىمىزدا تۇرىپ، بىزدەن اقتالماقسىڭدار»، - دەپ شۇيلىكتى ق. ءمامي.

ونىڭ ايتۋىنشا، حالىقتىڭ ارىزدارى وبلىستىق سوتقا 2 - جەلتوقساندا جولدانعان. الايدا سودان بەرى ەشقانداي شارا قولدانىلماعان.

«سىزدەر حالىق ارىزى تۇگىلى، جوعارعى سوتتىڭ حاتتارىن وقىمايتىن شىعارسىزدار. جۇمىسقا باراسىزدار ما ءوزى؟ حالىق وزدەرى (كىنالىنى - رەد.) جازاعا تارتقانىن كۇتىپ وتىرسىزدار ما؟ بارلىق ەلگە تاعى اتاعىمىز شىعادى عوي، سول كەزدە عانا قوزعالاتىن شىعارمىز. بۇل كيكىلجىڭدى تولىقتاي شەشۋگە 10 كۇن بەرەمىن»، - دەپ ەسكەرتتى جوعارعى سوت ءتوراعاسى.

اۆتور: جاسۇلان جولدىبايەۆ

سوڭعى جاڭالىقتار