ساياسات تانۋشى مارات ءتاجيننىڭ تاعايىندالۋ سەبەپتەرىنە قاتىستى ءوز بولجامدارىن ۇسىندى

مارات ءتاجيننىڭ پرەزيدەنت اكىمشىلىگىنە قايتا تاعايىندالۋىن، ساياساتتانۋشى «ءبىرشاما قىزىق تاعايىنداۋ بولدى» دەپ ەسەپتەيدى.
ونىڭ پىكىرىنشە، مارات ءتاجين پرەزيدەنت اكىمشىلىگىنە ساياسي قۇرامنىڭ ءرولىن ارتتىرۋ ماقساتىندا قايتا قىزمەتكە الىندى، سەبەبى ول قىزمەت «سوڭعى كەزدەرى قاتتى السىرەپ قالعان بولاتىن». ەكىنشى باعىت، بولجامدارعا بايلانىستى. «مەملەكەتتىك ورگانداردىڭ باسىم بولىگى ەكونوميكالىق جانە ساياسي تۇرعىداعى ۇردىستەردى، ءوز شەشىمدەرىنىڭ سالدارلارىن بولجاۋدى ءالى ۇيرەنە قويماعاندىعىن تاجىريبە كورسەتىپ وتىر»، - دەدى دوسىم ساتپايەۆ.
ساراپشىنىڭ ەسەپتەۋىنشە، پ ءا باسشىسىنىڭ جاڭا ورىنباسارى مەملەكەتتىڭ اقپاراتتىق ساياساتىن جاڭعىرتۋ ىسىمەن اينالىساتىن بولادى.
«كوپ جىلدار بويى ول مەملەكەت باسشىسىنىڭ جانىندا يدەولوگ رەتىندە جۇمىس ىستەدى جانە ول مەملەكەتتىڭ ىشكى ساياساتىنا قاتىستى ءبىرقاتار باعدارلامالاردىڭ جاساقتاۋشىسى بولدى. مەنىڭ ويىمشا، ولقىلىقتاردى تۇزەۋ ءۇشىن ونىڭ وسى تاجىريبەسى مەن قابىلەتى قازىر قاجەت بولعان دا شىعار، - دەيدى ول. - ونىڭ ۇستىنە بيلىك تارماقتارىن ءبولۋ بويىنشا جۇمىس توبىنىڭ قۇرىلعان ساتىندە كەلۋى تەگىن ەمەس سياقتى. سەبەبى ونىڭ قۇرامىنا پ ءا باسشىسى كىرىپ وتىر».
ساياسات تانۋشىنىڭ ويىنشا، مارات ءتاجين دە پرەزيدەنت اكىمشىلىگى باسشىسىنىڭ ورىنباسارى رەتىندە وسى ىستەرگە قاتىسۋى ابدەن مۇمكىن.
اۆتور: جاسۇلان جولدىبايەۆ