نازاربايەۆ شاحان كەنتىندەگى توتەنشە جاعدايعا بايلانىستى كوڭىل ايتتى

استانا. قازاقپارات - قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ قاراعاندى وبلىسىنىڭ شاحان كەنتىندە بولعان توتەنشە جاعدايعا بايلانىستى كوڭىل ايتتى، دەپ حابارلايدى اقوردانىڭ باسپا ءسوز قىزمەتى.

مەملەكەت باسشىسى قاراعاندى وبلىسى شاحان كەنتىندە كوپ پاتەرلى ءۇيدىڭ كىرەبەرىسى قۇلاپ، ادام شىعىنىنا اكەپ سوقتىرعانى تۋرالى حاباردى زور كۇيزەلىسپەن قابىلدادى.

قازاقستان پرەزيدەنتى قازا بولعانداردىڭ تۋىستارى مەن جاقىندارىنا كوڭىل ايتىپ، زارداپ شەككەندەردىڭ تەزىرەك ساۋىعىپ كەتۋىنە تىلەكتەستىك ءبىلدىردى. ەلباسى قاراعاندى وبلىسىنىڭ اكىمىنە، سونداي-اق ۋاكىلەتتى مەملەكەتتىك ورگاندارعا زارداپ شەككەن تۇرعىنداردىڭ بارىنە جان-جاقتى كومەك كورسەتۋ ءۇشىن ءتيىستى شارالار قابىلداپ، توتەنشە وقيعانىڭ سەبەبىن انىقتاۋ جونىندە تاپسىرما بەردى.

ەسكە سالا كەتەيىك، 1- قاڭتار كۇنى ساعات 22:40 تا قاراعاندى وبلىسى ت ج د قۇتقارۋ بولىمىنە شاحتينسك قالاسىنا قاراستى شاحان كەنتىندەگى كوپ قاباتتى ءۇيدىڭ ءبىر بولىگى وپىرىلىپ تۇسكەنى تۋرالى قوڭىراۋ شالىنعان. وقيعا ورنىنا شۇعىل تۇردە ت ج د قۇتقارۋشىلارى جونەلتىلىپ، تۇرعىندار قاۋىپسىز جەرگە كوشىرىلدى.

اۋەلى 1 ادامنىڭ ءمايىتى ءۇيىندى استىنان شىعارىلعان بولاتىن. كەيىن ەكىنشى تۇرعىننىڭ دەنەسى ءۇيىندى استىنان تابىلدى. قازىرگى ۋاقىتقا دەيىن ءۇيىندى استىنان 9 كوز جۇمعان ادامنىڭ دەنەسى ارشىپ الىندى. ونىڭ ۇشەۋى ەر ادام، ۇشەۋى ايەل، ۇشەۋى بالا. بالانىڭ بىرەۋى 2016-جىلعى، ەكىنشىسى 2010-جىلعى.