قازاقستان ب ۇ ۇ ق ك تۇراقتى ەمەس مۇشەسى قىزمەتىنە كىرىستى

استانا. قازاقپارات - قازاقستان بىرىككەن ۇلتتار ۇيىمى قاۋىپسىزدىك كەڭەسىنىڭ تۇراقتى ەمەس مۇشەسى قىزمەتىنە رەسمي تۇردە كىرىستى.

ەلىمىز بۇل مىندەتتى 2018-جىلدىڭ سوڭىنا دەيىن اتقارماق. اتالعان ميسسيا قاۋىپسىزدىك كەڭەسىندە ءتوراعالىق ەتۋگە، وتىرىس شاقىرۋعا جانە تالقىلاناتىن كۇن ءتارتىبىن تۇزۋگە قۇقىق بەرەدى.

سونىمەن بىرگە، رەسپۋبليكامىز ءۇشىن وزەكتى ماسەلەلەردى كوتەرىپ، الەم نازارىن اۋدارۋعا مۇمكىندىك تۋىپ تۇر، دەپ جازادى khabar.kz.

ەسكە سالا كەتەيىك، قازاقستان بىرىككەن ۇلتتار ۇيىمى قاۋىپسىزدىك كەڭەسىنىڭ تۇراقتى ەمەس مۇشەسى بولىپ 2016-جىلدىڭ 28- ماۋسىمىندا سايلاندى. ءبىزدىڭ كانديداتۋرانى 138 مەملەكەت قولداعان. قازاقستان - الەمدىك ماڭىزى زور ۇيىمنىڭ ساياسي ورگانىنا سايلانعان ورتالىق ازياداعى العاشقى ەل.

سونىمەن قاتار، حالىقارالىق قاۋىمداستىقتىڭ باس حاتشىسى اۋىستى. پان گي مۋننىڭ ورنىنا انتونيو گۋتەررەش كەلدى. توعىزىنشى باس حاتشى 5 جىلدىق مەرزىمگە ارنالعان باسىم باعىتتاردى بەلگىلەپ، ەڭ باستى مىندەت سيرياداعى اسكەري قاقتىعىسقا نۇكتە قويۋ ەكەنىن مالىمدەپ تە ۇلگەردى.

سونداي-اق گۋتەررەش بىرىككەن ۇلتتار ۇيىمىن قايتا قۇرىلىمداۋعا نيەتتى. مۇنداي شارالار الەم قاۋىمداستىعىنىڭ ۇيىمعا دەگەن سەنىمىن نىعايتۋ ءۇشىن قاجەت.