نازاربايەۆ بارشا قازاقستاندىقتى جاڭا جىلمەن قۇتتىقتادى
«قىمباتتى وتانداستار! ساناۋلى ساتتەردەن سوڭ ءبىز جاڭا 2017 -جىلعا قادام باسامىز. ءوتىپ بارا جاتقان مەشىن جىلى ەلىمىز ءۇشىن ەرەكشە مەرەيلى مەجە بولدى. بيىل بۇكىل حالىق بولىپ، قاستەرلى تاۋەلسىزدىگىمىزدىڭ 25 جىلدىعىن اتاپ وتتىك. جاس مەملەكەتتىڭ شيرەك عاسىرلىق شەجىرەسى ەل تاريحىندا التىن ارىپپەن جازىلدى. بۇل ءبىزدىڭ ماڭدايىمىزعا بۇيىرعان مەرەيلى مارتەبە، ەنشىمىزگە تيگەن ەرەن باقىت. جاڭا جىلدى قارسى الار ساتتە بەرەكە بىرلىگى جاراسقان حالقىما زور العىس ايتامىن. بيىلعى مەرەيتويلىق جىل ءبىز ءۇشىن ءبىرقاتار ماڭىزدى شارالارعا تولى بولدى. ەلدىڭ ساياسي ومىرىندە ەلەۋلى ناۋقان پارلامەنت سايلاۋىن وتكىزدىك.
ۇلى ماقسات كوزدەگەن ۇلت جوسپارىنىڭ العاشقى جىلىن تابىستى اياقتادىق. الداعى 2017 -جىلدىڭ ەنشىسىندە ايتۋلى وقيعالار مەن اۋقىمدى ىستەر مول بولماق. ەلىمىز بىرىككەن ۇلتتار ۇيىمى قاۋىپسىزدىك كەڭەسىنىڭ تۇراقتى ەمەس مۇشەسى رەتىندە قىزمەتىن باستايتىن بولادى. بۇل كەز كەلگەن مەملەكەت قول جەتكىزە بەرمەيتىن اسقاق ابىروي، مارتەبەلى مىندەت. كەلەر جىلى استانا مەيماندارى ەكسپو-2017 حالىقارالىق كورمەسىندە باس قوساتىن بولادى.
سونىمەن قاتار الماتىدا دۇنيەجۇزىلىك قىسقى ۋنيۆەرسيادانىڭ الاۋى جاعىلادى. ەڭسەلى ەلوردامىزدا يسلام ىنتىماقتاستىق ۇيىمىنىڭ ءسامميتى وتەدى. ەل قۋاتتى بولماي، باق تۇراقتى بولمايدى. حالىقتىڭ ءال- اۋقاتىن ارتتىرىپ، ەكونوميكامىزدى دامىتۋعا ارنالعان شارالار جالعاسىن تابادى. بز ەندى تاۋەلسىز ەلىمىز ءۇشىن جاڭا 25 جىلدىقتىڭ جارقىن پاراعىن اشامىز. تابالدىرىقتان اتتاعالى تۇرعان جاڭا جىل تابىستى دا تاعلىمدى جىل بولسىن!»، - دەپ قۇتتىقتادى قازاقستاندىقتاردى ەلباسى نۇرسۇلتان نازاربايەۆ.
