نازاربايەۆ ەلورداداعى جاڭا جىلدىق قايىرىمدىلىق كەشىنە قاتىستى
بۇل تۋرالى اقوردانىڭ باسپا ءسوز قىزمەتى حابارلادى. نۇرسۇلتان نازاربايەۆ قاتىسۋشىلارعا ارناعان سوزىندە ەلىمىزدىڭ بۇگىنگى جەتىستىكتەرى بۇكىل قازاقستاندىقتاردىڭ ورتاق ەڭبەگى مەن بىرلىگىنىڭ جەمىسى ەكەنىن ايتتى.
قازاقستان پرەزيدەنتى كەلەر جىلى بولاتىن ۇلتتىق جانە حالىقارالىق اۋقىمداعى ءىرى وقيعالاردى اتاپ ءوتتى. ولاردىڭ قاتارىندا دۇنيەجۇزىلىك ۋنيۆەرسيادا، ەكسپو حالىقارالىق كورمەسى، يسلام ىنتىماقتاستىعى ۇيىمىنىڭ ءسامميتى بار. سونداي-اق، ەلباسى مۇقتاج جاندارعا كومەك كورسەتۋ جانە قايىرىمدىلىق ءىس-شارالارى حالقىمىزدىڭ يگى ءداستۇرى ەكەنىنە توقتالدى.
سوڭىندا نۇرسۇلتان نازاربايەۆ جينالعانداردى كەلە جاتقان جاڭا جىلمەن قۇتتىقتاپ، بارشانىڭ وتباسىنا باق-بەرەكە، دەنساۋلىق، جاڭا تابىس تىلەدى. قايىرىمدىلىق كەشىنەن تۇسەتىن بارلىق قاراجات «مەيىرىم» ەرىكتى قوعامى» قورىنا اۋدارىلاتىن بولادى.
