قازاقستان رەسپۋبليكاسى ۇلتتىق قاۋىپسىزدىك كوميتەتىنىڭ بۇرىنعى باسشىسى تۇتقىندالدى

استانا. قازاقپارات - قازاقستان رەسپۋبليكاسى ۇلتتىق قاۋىپسىزدىك كوميتەتى مەملەكەتتىك ورگاندارداعى ءبىرقاتار لاۋازىمدى تۇلعالارىنا قاتىستى سوتقا دەيىنگى تەرگەپ- تەكسەرۋ جۇمىستارىن جۇزەگە اسىرۋدا، دەپ حابارلايدى ۇ ق ك باسپا ءسوز قىزمەتى.

جۇرگىزىلگەن جەدەل ىزدەستىرۋ ءىس- شارالارى بارىسىندا 2016 -جىلدىڭ 26 -جەلتوقسانىندا قازاقستان رەسپۋبليكاسىنىڭ قىلمىستىق كودەكسى 185-بابىنىڭ 3-تارماعىندا («مەملەكەتتىك قۇپيالاردى جاريا ەتۋ») جانە 362-بابىنىڭ 3-تارماعىندا («بيلىكتى نەمەسە لاۋازىمدىق وكىلەتتىكتەردى اسىرا پايدالانۋ») كوزدەلگەن قىلمىستاردى جاساۋعا كۇدىكتىلىگى بويىنشا دۇتبايەۆ نارتاي نۇرتاي ۇلى، حاسەن نۇرلان بولات ۇلى جانە نۇرتايەۆ ەرلان ءسۇيىمباي ۇلى ۇستالدى.

كورسەتىلگەن تۇلعالار قازاقستان رەسپۋبليكاسى قىلمىستىق- پروتسەسسۋالدىق كودەكسىنىڭ 128-بابىنا سايكەس ۇ ق ك تەرگەۋ وقشاۋلاعىشىنا قامالدى. كۇدىكتىلەردىڭ جانە ولاردىڭ تۋىستارىنىڭ تۇرعىلىقتى جەرلەرى بويىنشا تىنتۋلەر جۇرگىزىلدى، زاتتاي دالەلدەمەلەر الىندى. تەرگەپ- تەكسەرۋ جالعاستىرىلۋدا، ونىڭ بارىسى جانە ناتيجەلەرى تۋرالى قوسىمشا حابارلانادى.

نارتاي دۇتبايەۆ قازاقستان رەسپۋبليكاسى ۇلتتىق كوميتەتى ءتوراعاسى قىزمەتىن اتقارعان (11.12.2001-22.02.2006).