مينيستر كەيكى باتىردىڭ ۇرپاقتارى باباسىنىڭ باس سۇيەگىن نەگە قارسى الا الماعانىن ءتۇسىندىردى
ونىڭ سوزىنە قاراعاندا، ر ف مادەنيەت ءمينيسترى ۆلاديمير مەدينسكيدىڭ ءوتىنىشى بويىنشا سول كۇنى اۋەجايدا سالتاناتتى شارا ۇيىمداستىرىلمادى.
«اۋەجايدا «باتىردىڭ باس سۇيەگى نەگە سالتاناتتى تۇردە قارسى الىنبادى؟» دەگەن سۇراقتار بولدى. بۇل رەتتە رەسەيلىك تاراپتىڭ ۇلكەن ءوتىنىشى بولعان ەدى. رەسەيدىڭ مادەنيەت ءمينيسترى مەدينسكي مەملەكەتتىك دۋماداعى سايلاۋ قارساڭىندا تاريحي قۇندىلىقتار بويىنشا ءارتۇرلى تۇسىنىكتەمەلەر بەرىلىپ جاتقاندىقتان، بۇل باعىتتاعى اقپاراتتاردىڭ كەڭ تاراماۋىن قاداعالاۋدى قاتتى وتىنگەن ەدى. ويتكەنى قالىپتاسقان جاعدايدى اركىم وزىنشە پايدالانىپ، ءوز كەزەگىندە ول مەملەكەتتىك دۋماداعى سايلاۋعا كەرى اسەرىن تيگىزۋى مۇمكىن ەدى»، - دەدى مينيستر ۆەدومستۆودا وتكەن باسپا ءسوز ءماسليحاتىندا.
وسى رەتتە ول رەسەيلىك تاراپتىڭ ءوتىنىشىن ورىنداۋ وڭاي بولماعانىن جەتكىزدى.
«ارتەفاكتىنى الا تۇرا، ول جايىندا ەشتەڭە ايتپاۋ ءبىز ءۇشىن قيىندىق تۋدىردى. ارينە، ءبىز ۋادەمىزدى ورىنداۋعا ءماجبۇر بولدىق»، - دەدى مۇحامەدي ۇلى.
بۇدان بۇرىن حابارلانعانداي، 6- قازاندا كەيكى باتىردىڭ باس سۇيەگى تاڭعى ساعات 04:50-دە ماسكەۋدەن ارنايى بورتپەن ەلورداعا جەتكىزىلەتىنىن ەستىگەندەر استاناداعى حالىقارالىق اۋەجايعا جينالعان. الايدا، باس سۇيەكتىڭ ارنايى رەيسپەن جەتكىزىلۋىنە بايلانىستى جينالعان قاۋىم ونى سالتاناتتى تۇردە قارسى الا الماعان ەدى.
اۆتور: رۋسلان عابباسوۆ
