ەكسپو كەزىندە بايقوڭىرعا ۇشاتىن تىكەلەي اۋە رەيستەرىن اشۋ ۇسىنىلدى

استانا. قازاقپارات - ەكسپو كورمەسىن ۇيىمداستىرۋ مەن وتكىزۋ جونىندەگى قوعامدىق كەڭەس مۇشەلەرى كورمە كەزىندە بايقوڭىرعا ۇشاتىن تىكەلەي اۋە رەيستەرىن اشۋدى ۇسىنىپ وتىر، دەپ حابارلايدى قازاقپارات ءتىلشىسى.

«بايقوڭىر» عارىش ايلاعىندا تۋريزمدى دامىتۋ ماقساتىندا «روس كوس موس» باسشىلىعىمەن «استانا-بايقوڭىر-استانا» جانە «الماتى-بايقوڭىر-الماتى» تىكەلەي اۋە رەيستەرىن اشۋ ماسەلەسىن شەشىپ الۋ قاجەت»، - دەيدى قوعامدىق كەڭەس ءتوراعاسى ەرلان سىدىقوۆ.

بۇدان بولەك، كەڭەس مۇشەلەرى بايقوڭىر عارىش ايلاعىندا تۋريزمدى دامىتۋ باعدارلاماسىن بەكىتۋ شارالارىن شاپشاڭداتۋ قاجەت دەپ سانايدى. وسى ورايدا شەتەل ازاماتتارىنىڭ عارىش ايلاعىنا كىرۋىنە رۇقسات بەرۋ مەرزىمىن 45 كۇننەن 14 كۇنگە دەيىن قىسقارتۋ ماسەلەسىن شەشۋ كەرەك.

ايتا كەتەيىك، بۇگىنگى وتىرىس بارىسىندا كەڭەس مۇشەلەرى تاعى ءبىرقاتار ۇسىنىستارىن جاريالادى. سونىڭ ىشىندە تۋريزم ماسەلەلەرىمەن اينالىساتىن بولەك مەملەكەتتىك ورگاندى اشۋ باستاماسى دا بار. كەڭەس ءتوراعاسى ەرلان سىدىقوۆتىڭ ايتۋىنشا، ەكسپو كورمە كەزىندە ۋنيۆەرسيتەت جاتاقحانالارى جالعا بەرىلەدى.

اۆتور: ارمان اسقاروۆ