ەكسپو قارساڭىندا تۋريزم مينيسترلىگىن قۇرۋ قاجەت - قوعامدىق كەڭەس

استانا. قازاقپارات - ەكسپو كورمەسىن ۇيىمداستىرۋ مەن وتكىزۋ جونىندەگى قوعامدىق كەڭەس قازاقستاندا تۋريزم ماسەلەلەرىمەن اينالىساتىن بولەك مەملەكەتتىك ورگاندى قۇرۋدى ۇسىنىپ وتىر.

اتالعان باستاما كەڭەستىڭ ءبىر جىلدا اتقارعان جۇمىستىڭ ناتيجەسى بويىنشا ازىرلەنگەن ون ناقتى ۇسىنىسقا ەندى، دەپ حابارلايدى قازاقپارات ءتىلشىسى.

«بىرىنشىدەن، تۋريزمدى دامىتۋ بويىنشا جەكە مەملەكەتتىك ورگاندى قۇرۋ قاجەت. ءبىز وسىنى كەڭىنەن تالقىلاپ، حاتتاماعا ەنگىزگەن بولاتىنبىز»، - دەدى بۇگىنگى وتىرىس بارىسىندا كەڭەس ءتوراعاسى ەرلان سىدىقوۆ.

وسى ورايدا ساياساتتانۋشى مارات شيبۇتوۆ بولەك مەملەكەتتىك ورگاننىڭ ناقتى قۇرىلىمىن كورسەتىپ، ۇسىنىستا «تۋريزمدى دامىتۋ كوميتەتىن قۇرۋ قاجەت» دەپ جازۋدى ۇسىندى.

الايدا ەسەپ كوميتەتىنىڭ مۇشەسى سەرىك نوگەربەكوۆ ونىمەن كەلىسكەن جوق. «بۇل جەردە «بولەك مەملەكەتتىك ورگاندى قۇرۋ قاجەت» دەپ ناقتى جازىلعان. بۇل، كەم دەگەندە، اگەنتتىك نەمەسە مينيسترلىك. ال كوميتەت بولەك مەملەكەتتىك ورگانعا جاتپايدى. ول - مينيسترلىك ىشىندەگى قۇرىلىم عانا»، - دەيدى س. نوگەربەكوۆ.

ايتا كەتەيىك، بۇگىندە قازاقستانداعى تۋريزم ماسەلەلەرىمەن ق ر ينۆەستيتسيالار جانە دامۋ مينيسترلىگىنىڭ قۇرامىنا كىرەتىن تۋريزم يندۋسترياسى دەپارتامەنتى اينالىسادى.

اۆتور: ارمان اسقاروۆ