ەكسپو كەزىندە ۋنيۆەرسيتەت جاتاقحانالارى جالعا بەرىلەدى

استانا. قازاقپارات - ەكسپو كورمەسىن ۇيىمداستىرۋ جانە وتكىزۋ جونىندەگى قوعامدىق كەڭەستىڭ ءتوراعاسى، ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆتىڭ ايتۋىنشا، الدىمەن استاناداعى جاتاقحانالاردىڭ جاعدايىنا باعالاۋ جۇمىستارى جۇرگىزىلەدى.

سونىڭ نەگىزىندە كورمە كەزىندە جالعا بەرىلەتىن جاتاقحانالار انىقتالادى، دەپ حابارلايدى قازاقپارات ءتىلشىسى.

«قالاداعى باستى پروبلەما - جاتاتىن ورىنداردىڭ تاپشىلىعى. قوناق ۇيلەر جەتىسپەيدى. سوندىقتان جوعارى وقۋ ورىندارى جازدى كۇنى وزدەرىنىڭ جاتاقحانالارىن بوساتىپ بەرۋگە ءازىر. ويتكەنى بۇل ۇلتتىق جوبا عوي. سوندىقتان وعان ءبارىمىز اتسالىسۋىمىز قاجەت. كەلەم دەيتىن ادامداردىڭ بارلىعى جاقسى پىكىرمەن، جاقسى كوزقاراسپەن قايتۋى قاجەت. ول ءۇشىن جاتار ورنى مەن وندا اتقارىلاتىن قىزمەت جوعارى دەڭگەيدە بولۋى شارت»، - دەدى ە. سىدىقوۆ كەڭەستىڭ بۇگىنگى وتىرىسىندا.

رەكتوردىڭ ايتۋىنشا، «استانا كونۆەنشن» مەن «استانا ەكسپو» كومپانيالارى جاتاقحانالاردى ءتيىستى تالاپتار بويىنشا تاڭدايدى. «ءبىز سول تالاپتىڭ تۇرعىسىنان شىعاتىن بولساق، جاتاقحانانى قابىلداپ الادى. ارينە، ونىڭ بارلىعى تەگىن بولمايدى. اركىم ءوز اقىسىن تولەيدى. ءبىراق ول قىمبات بولمايدى. قوناق ۇيلەرمەن سالىستىرعاندا، وتە ارزان بولادى»، - دەپ اتاپ كورسەتتى ۋنيۆەرسيتەت رەكتورى.

اۆتور: ارمان اسقاروۆ