ق ر پرەزيدەنتى جۇمىس ساپارىمەن رەسەيگە بارادى

استانا. قازاقپارات - قازاقستان پرەزيدەنتى نۇرسۇلتان نازاربايەۆ پەن رەسەي فەدەراتسياسىنىڭ باسشىسى ۆلاديمير پۋتين سانكت-پەتەربوردا ەكىجاقتى جانە حالىقارالىق وزەكتى ماسەلەلەردى تالقىلاماق.

بۇل تۋرالى كرەملدىڭ رەسمي سايتىندا حابارلاندى. كەزدەسۋ 2016-جىلدىڭ 26- جەلتوقسانىندا وتەتىن جوعارى ەۋرازيالىق ەكونوميكالىق كەڭەسى (ج ە ە ك) مەن ۇجىمدىق قاۋىپسىزدىك كەڭەسى سەسسياسىنىڭ وتىرىستارى قارساڭىندا وتەتىن بولادى. سونداي-اق ج ە ە ك كەزدەسۋى بارىسىندا قازاقستان، ارمەنيا، بەلارۋس، قىرعىزستان جانە رەسەي باسشىلارى ەۋرازيالىق ەكونوميكالىق وداعىنىڭ العاشقى ەكىجىلدىق جۇمىسىنىڭ قورىتىندىسىن شىعارىپ، ينتەگراتسيالىق بىرلەستىكتى ودان ارى دامىتۋ بويىنشا باعىت-باعدارلاردى ايقىندايتىن بولادى.

سامميتتىڭ باستى شارالارىنىڭ ءبىرى قول قويۋ كۇتىلىپ وتىرعان ە ا ە و- ءنىڭ كەدەن كودەكسى تۋرالى كەلىسىم-شارت بولماق. سونىمەن قاتار ءبىرقاتار وزگە دە ماڭىزدى كوپجاقتى قۇجاتتاردىڭ قابىلدانۋى جوسپارلانعان. مەملەكەت باسشىلارى وداقتىڭ 2017-جىلعى حالىقارالىق قىزمەتىنىڭ نەگىزگى باعىتتارىن بەكىتىپ، ەۋرازيالىق وداقتىڭ باستى ساۋدا-ەكونوميكالىق سەرىكتەستەرىمەن ىقپالداستىعىنىڭ ءتۇرلى اسپەكتىلەرىن تالقىلايتىن بولادى.

ۇجىمدىق قاۋىپسىزدىك تۋرالى شارت ۇيىمى (ۇ ق ش ۇ) وتىرىسىنىڭ شەڭبەرىندە قازاقستان، ارمەنيا، بەلارۋس، قىرعىزستان، تاجىكستان جانە رەسەي كوشباسشىلارى ۇيىم اياسىنداعى وداقتىق ءوزارا ارەكەتتەستىكتىڭ وزەكتى سالالارىن، ونىڭ اعىمداعى قىزمەتىن قامتاماسىز ەتۋ ماسەلەلەرىن كوتەرەدى.

لاڭكەستىك جانە ەكسترەميستىك قاۋىپ-قاتەرلەرگە قارسى تۇرۋ، ەسىرتكى مەن قارۋ-جاراقتىڭ زاڭسىز اينالىمىمەن كۇرەس تاقىرىپتارىن قوسا العاندا، جاھاندىق جانە وڭىرلىك كۇن تارتىبىندەگى باستى ماسەلەلەر بويىنشا پىكىر الماسۋ جوسپارلانۋدا.

«ج ە ە ك پەن ۇ ق ش ۇ وتىرىستارى قارساڭىندا قازاقستان پرەزيدەنتى نۇرسۇلتان نازاربايەۆ جۇمىس ساپارىمەن سانكت-پەتەربور قالاسىنا كەلەدى. رەسەي جانە قازاقستان باسشىلارى ەكىجاقتى جانە حالىقارالىق وزەكتى ماسەلەلەردى تالقىلايتىن بولادى»، - دەلىنگەن كرەملدىڭ تاراتقان حابارلاماسىندا.