ءابدىقالىقوۆا: ءتول تەڭگەمىزدى ەنگىزۋ - كورەگەن ءارى تاعدىرشەشتى قادام بولدى
كونفەرەنتسياعا قاتىسۋشىلارعا ارناپ ق ر مەملەكەتتىك حاتشىسى گۇلشارا ءابدىقالىقوۆا قۇتتىقتاۋ ءسوز سويلەدى. ءوز سوزىندە مەملەكەتتىك حاتشى كونفەرەنتسيا ەل تاۋەلسىزدىگىنىڭ 25 جىلدىعىنىڭ سالتاناتتى بەلەسى قارساڭىندا ءوتىپ وتىرعانىن اتاپ كورسەتتى.
«مەملەكەت باسشىسىنىڭ سىندارلى كوشباسشىلىعىنىڭ ارقاسىندا قازاقستان تۇتاستاي داۋىرمەن تەڭەسەتىن جولدان ءوتتى. جارقىن جەتىستىكتەر مەن تولاعاي تابىستاردىڭ 25 جىلى - ەلباسىنىڭ كورەگەن جانە سارابدال ساياساتىنىڭ سالتاناتىنا اينالدى»، - دەدى گ. ءابدىقالىقوۆا.
مەملەكەتتىك حاتشى ەلباسى نۇرسۇلتان نازاربايەۆتىڭ جالپى ۇلتتىق بىرلىك پەن قوعامدىق كەلىسىمنىڭ بىرەگەي ۇلگىسى قازاقستاننىڭ جارقىن جەتىستىكتەرىنىڭ شەشۋشى فاكتورىنا اينالعانىن، قازاقستان حالقى اسسامبلەياسى ونىڭ باستى ۇيىتقىسى بولعانىن ايتتى. مەملەكەتتىك حاتشى كونفەرەنتسياعا قاتىسۋشىلاردى كاسىبي مەرەكە - ۇلتتىق ۆاليۋتا كۇنىمەن قۇتتىقتاپ، مەملەكەت باسشىسىنىڭ 1993-جىلى ءتول تەڭگەمىزدى ەنگىزۋ تۋرالى تاريحي شەشىمى كورەگەن، ءارى تاعدىرشەشتى قادام بولعانىن اتاپ ءوتتى.
ءىس-شارا بارىسىندا ق ر ۇلتتىق بانكىنىڭ ءتوراعاسى دانيار اقىشيەۆ تاۋەلسىزدىكتىڭ 25 -جىلدىعىنا ارنالعان 10 مىڭدىق سۋۆەنيرلىك بانكنوتتى جانە مونەتانى تانىستىردى. باس قوسۋدا سونداي-اق، وزگە دە مەملەكەت جانە قوعام قايراتكەرلەرى، عالىمدار مەن ەكونوميستەر ءسوز سويلەدى.
