نازاربايەۆ ق ح ر پرەمەر-ءمينيسترى لي كىچياڭمەن كەزدەستى
كەزدەسۋدە ەلباسىنىڭ ق ح ر- عا بيىلعى قىركۇيەكتەگى جۇمىس ساپارى بارىسىندا قول جەتكىزىلگەن قازاقستان مەن قىتاي اراسىنداعى ۋاعدالاستىقتاردىڭ ىسكە اسىرىلۋ ماسەلەلەرى تالقىلاندى.
مەملەكەت باسشىسى قىتايدىڭ ماڭىزدى ستراتەگيالىق سەرىكتەسىمىز ەكەنىن اتاپ ءوتىپ، ەكى ەلدىڭ قالىپتاسقان ءوزارا قارىم-قاتىناسىن باسقالار ءۇشىن ۇلگى دەپ سانايتىنىن ايتتى.
- وتكەن جولعى قازاقستانعا ساپارىڭىزدا ءسىز ەكونوميكالىق ىنتىماقتاستىقتىڭ باعدارلاماسىن ۇسىنعان ەدىڭىز. بۇل باعدارلاما اياسىندا ءبىرقاتار كەلىسىمدەرگە قول قويىلىپ، بۇگىندە ىسكە اسىرىلا باستادى، - دەدى نۇرسۇلتان نازاربايەۆ.
قازاقستان پرەزيدەنتى قىركۇيەكتە ەكىجاقتى قارىم-قاتىناستىڭ جانە حالىقارالىق كۇن ءتارتىبىنىڭ كەڭ اۋقىمدى ماسەلەلەرى تالقىلانعانىن ەسكە سالدى.
- ساپار بارىسىندا جالپى قۇنى 20 ميلليارد دوللاردان اساتىن 51 جوبا بويىنشا ۋاعدالاستىققا قول جەتكىزدىك. ياعني، قىتاي حالىق رەسپۋبليكاسى ءبىزدىڭ نەگىزگى ينۆەستورىمىز بولىپ سانالادى، - دەدى نۇرسۇلتان نازاربايەۆ.
لي كىچياڭ قازاقستانعا شاقىرعانى ءۇشىن ەلباسىعا العىس ايتىپ، ونىڭ ساپارى ەلدەرىمىز اراسىنداعى قارىم-قاتىناستىڭ ستراتەگيالىق ءمانى مەن دوستىق سيپاتىن كورسەتەتىنىن جەتكىزدى.
قىتاي پرەمەر-ءمينيسترى سونداي-اق ق ح ر ءتوراعاسى شي جينپيڭدى قازاقستانعا شاقىرعانى ءۇشىن دە نۇرسۇلتان نازاربايەۆقا العىس ءبىلدىردى.
- ءبىز الداعى ۋاقىتتا دا جوعارى دەڭگەيدەگى بايلانىستارىمىزدى جالعاستىرۋعا نيەتتىمىز. ويتكەنى ول ءوزارا ءتيىمدى ىنتىماقتاستىقتى نىعايتۋعا مۇمكىندىك بەرەدى، - دەدى لي كىچياڭ.
ەكى ەل اراسىنداعى كەلىسىمدەردىڭ تابىستى جۇزەگە اسۋىنىڭ جارقىن مىسالى رەتىندە لي كىچياڭ اۆتوموبيل قۇراستىرۋ جونىندەگى يندۋستريالدى ىنتىماقتاستىق جوباسىن اتادى.
مەملەكەت باسشىسى وسى كاسىپورىندا بولعان كەزدە ەلىمىزدە العاش رەت قۇراستىرىلعان ەلەكتروموبيلدى ءوزى جۇرگىزىپ كورگەنىن ايتتى.
قازاقستان پرەزيدەنتى تاراپتار قول جەتكىزگەن ۋاعدالاستىقتاردىڭ ورىندالۋى وڭ قارقىن الىپ وتىرعانىنا نازار اۋداردى.
كەزدەسۋ سوڭىندا نۇرسۇلتان نازاربايەۆ قابىلدانعان بارلىق جوبالار ساپالى تۇردە جانە يننوۆاتسيالىق دەڭگەيدە ىسكە اسىرىلاتىنىنا سەنىم ءبىلدىردى.
