استانادا شەنەۋنىكتەردىڭ جەر ساتۋداعى قىلمىستىق ارەكەتتەرى اشكەرە بولدى

استانا. قازاقپارات - باس پروكۋرور جاقىپ اسانوۆ استانا ماڭىندا اسا ءىرى كولەمدە جەرلەردى زاڭسىز ساتۋ قىلمىسىنا كوز جۇما قاراعان شەنەۋنىكتەردىڭ اتتارىن اتاۋدى بۇيىردى، دەپ حابارلايدى قازاقپارات.

«مەن قوسشى بويىنشا ناقتىلاپ وتكىم كەلەدى. وندا جۇزدەگەن قاتىسۋشىلار بولعان، ساندار كەلتىرىلگەن، بارلىق جەردە حابارلامالار ىلىنگەن، بۇنى بارلىعى بىلگەن. ول جەرلەردى ءتىپتى مەملەكەتتىك قىزمەتكەرلەر دە ساتىپ الىپتى، اكىمدەر، پروكۋرورلار، بارلىعى حاباردار بولعان. سوندا كارتوپ وسىرەتىن القاپتا جەر بەرىلىپ جاتقانىن بارلىق حالىق بىلگەن. دەپۋتات بولعان كەزىمدە مەن دە ول جەرلەر ساتىلىپ جاتقانىن ەستىگەنمىن. بۇكىل حالىق ساتىپ الىپ جاتتى»، - دەدى ول بۇگىن جەرلەردى زاڭسىز باسىپ الۋعا قاتىستى وتكەن القا ءماجىلىسىنىڭ وتىرىسىندا.

باس پروكۋروردىڭ سوزىنشە، ول قىلمىستىق ءىس قازىر تەرگەلىپ جاتىر، 15 ادام قاماۋدا، ولاردىڭ باسىم بولىگى شەنەۋنىكتەر. 24 ادام قىلمىستىق ىسكە تارتىلدى. «جاقىندا ءىستى سوتقا جولدايمىز. تەرگەۋ جۇمىستارىن باس پروكۋراتۋرا جۇرگىزۋدە. سوتتىڭ شەشىمىن كۇتپەي-اق بۇعان قاتىسى بولعان وزگە دە شەنەۋنىكتەرگە جازا قولداناتىن بولامىز. سوندىقتان مەن تەرگەۋ توبىنان جەرلەر زاڭسىز ساتىلىپ جاتقانىن بىلگەن، ءبىراق ەش ارەكەت جاساماعان شەنەۋنىكتەردىڭ ءتىزىمىن كۇتىپ وتىرمىن. كوز الدارىندا وسى بىلىقتى كوردى، توقتاۋ سالمادى، ءبىراق قازىر ءالى كۇنگە دەيىن مەملەكەتكە قىزمەت ەتۋىن جالعاستىرۋدا. وندايلاردى مەملەكەتتىك قىزمەتتەن جەلكەلەپ قۋۋ كەرەك»، - دەپ ەسكەرتتى ج. اسانوۆ.

ۆەدومستۆو باسشىسىنىڭ سوزىنشە، قوسشى شەنەۋنىكتەرىنىڭ كەسىرىنەن 500 وتباسى جاپا شەكتى. «ول ەڭ جوعارى دەڭگەيدە تالقىلاندى. ادامدار جالعان شەنەۋنىكتەرگە الدانىپ قالدى. شىنىندا ولار ول كەزدە شەنەۋنىك بولماعان، ءبىراق وسى ىستە بارلىق قۇجاتتاردى بىلگەندىكتەن، قۇجاتتاردى وڭاي قولدان جاساعان»، - دەپ ءتۇيدى ويىن ج. اسانوۆ.

اۆتور: جاسۇلان جولدىبايەۆ