ەكسپو-عا وراي ۇلتتىق ۇلان اسكەرلەرى اعىلشىن ءتىلىن ۇيرەنەدى

استانا. قازاقپارات - ەكسپو كورمەسى كەزىندە اسكەري قىزمەتكەرلەر قىزمەت بابىندا مادەنيەت پەن ادەپ ساقتاپ، اعىلشىن تىلىندە سويلەۋى كەرەك، دەدى بۇگىن ورتالىق كوممۋنيكاتسيالار قىزمەتىندە وتكەن بريفينگ بارىسىندا ق ر ۇلتتىق ۇلان باس قولباسشىسىنىڭ ورىنباسارى مۇحامەتقالي ساتوۆ.

«ەكسپو كورمەسىنە ەلورداداعى بريگادامىزدىڭ ۇلاندارىن دايىنداپ جاتىرمىز. قازىر اسكەري قىزمەتكەرلەر اعىلشىن ءتىلىنىڭ باستاپقى دەڭگەيىن ۇيرەنىپ ءجۇر. ياعني، شەتەلدىك قوناق ءبىزدىڭ اسكەرلەردەن كوشەنىڭ اتاۋىن، بولماسا، بەلگىلى ءبىر ورىننىڭ مەكەن-جايىن سۇراسا، ولار جاۋاپ بەرە الۋى كەرەك»، - دەدى ساتوۆ جۋرناليستەردىڭ سۇراعىنا جاۋاپ بەرە كەلە.

ونىڭ ايتۋىنشا، جەدەل ماقساتتاعى بريگادا 2014-جىلى قۇرىلعان. قازىر بۇل بريگادادا 2500 ادام جۇمىس ىستەپ ءجۇر. ولاردىڭ اراسىندا وفيتسەرلەر، كەلىسىم-شارتپەن قىزمەت ەتىپ جۇرگەن اسكەريلەر مەن مەرزىمدى اسكەرلەر بار كورىنەدى.

«ەكسپو كورمەسى كەزىندە ەلوردانىڭ قوعامدىق قاۋىپسىزدىگىن قاداعالاۋ ءۇشىن كۇن سايىن 1,5 مىڭ اسكەريدى جۇمىلدىرامىز. قازىر ۇلتتىق ۇلان اسكەرلەرىنىڭ كيىم فورماسى جاڭارعان جانە دە بۇل قىزمەتكە كەلەم دەۋشىلەردى دە قاتال ءتارتىپ بويىنشا ىرىكتەيتىن بولعانبىز. ءبىزدىڭ تالابىمىزعا ساي، بويى 170 سانتيمەتردەن كەم ەمەس، دەنە جاتتىعۋى تاماشا، جاقىن تۋعان-تۋىسى قاماۋدا وتىرماعان جىگىتتەر ۇلتتىق گۆارديا قاتارىنا قوسىلا الادى. ونىڭ ۇستىنە، ەلورداداعى بريگادامىز ءۇشىن جوعارى ءبىلىمدى نەمەسە ورتا ءبىلىمدى، مىنەزدەمەسى جاقسى ادامداردى قابىلداي الامىز. كەلىسىم-شارتپەن جۇمىس ىستەيمىن دەگەن وفيتسەر اسكەري ينسيتۋتتى ءتامامداسا، بازالىق اسكەري ءبىلىمى بار بولسا، جەتكىلىكتى. كەلىسىمشارتپەن جۇمىس ىستەيتىن اسكەرلەر ءۇشىن باستى تالاپ - قارۋلى كۇشتەر قاتارىندا بورىشىن وتەپ كەلۋى»، - دەپ ءتۇسىندىردى م. ساتوۆ.