مەملەكەتتىك باسقارۋ اكادەمياسىندا تەك استانانىڭ شەنەۋنىكتەرى عانا وقي ما

استانا. قازاقپارات - ق ر مەملەكەتتىك قىزمەت ىستەرى جانە سىبايلاس جەمقورلىققا قارسى كۇرەس اگەنتتىگىنىڭ بۇگىنگى كەڭەيتىلگەن ماجىلىسىندە پرەزيدەنت اكىمشىلىگىنىڭ باسشىسى ادىلبەك جاقسىبەكوۆ مەملەكەتتىك باسقارۋ اكادەمياسىندا ءبىلىم بەرۋ ماسەلەسىن كوتەردى.

  ونىڭ ايتۋىنشا، بۇگىندە اتالعان وقۋ ورنىندا ءبىلىم الىپ جۇرگەندەردىڭ باسىم بولىگى - استانالىقتار، ال جەرگىلىكتى باسقارۋ بويىنشا ايماقتاردان كەلىپ وقيتىندار وتە از، دەپ حابارلايدى قازاقپارات.

«قازىرگى كەزدە اكادەميادا ءدارىس الاتىنداردىڭ ارا سالماعى دۇرىس ساقتالمايدى. وندا وقيتىنداردىڭ 68 پايىزى - استانادان جىبەرىلگەن شەنەۋنىكتەر. ال «جەرگىلىكتى باسقارۋ» ماماندىعى بويىنشا وقۋعا تۇسكەندەردىڭ ىشىندە تەك التى ايماقتىڭ عانا وكىلدەرى بار. اكادەميا تۇلەكتەرىنىڭ مەملەكەتتىك قىزمەتتە قالۋى دا ۇلكەن ماسەلە بولىپ تۇر. سوڭعى ون جىلدىڭ ىشىندە ول جەردە 1700 دەن استام ماگيستر مەن دوكتور دايارلاندى. الايدا، ولاردىڭ قايسىسى قازىر مەملەكەتتىك قىزمەتتە جۇمىس ىستەپ جاتىر؟ ونى ەشكىم بىلمەيدى. سوندىقتان اكادەميا باسشىلىعى وسى ماسەلەنى باقىلاۋعا الىپ، تۇلەكتەردى قايدا جانە قاي قىزمەتكە ورنالاسىپ جاتقانىن قاداعالاۋ قاجەت»، - دەدى ءا. جاقسىبەكوۆ.

ءوز سوزىندە پرەزيدەنت اكىمشىلىگىنىڭ باسشىسى ءبىرقاتار مينيسترلىكتەردە بوس ورىنداردىڭ ايلاپ تۇراتىنىن جەتكىزىپ، ولاي جالعاسا بەرسە، ول مەملەكەتتىك ورگانداردىڭ شتاتىن قىسقارتۋ قاجەتتىگىن ايتتى. ماسەلەن، قارجى مينيسترلىگىندە 970 قىزمەت ورنى بوس تۇرسا، ۇلتتىق ەكونوميكا مينيسترلىگىندە - 900 دەن استام، ال اۋىل شارۋاشىلىعى مينيسترلىگىندە 280 قىزمەتكە ادامدى ءالى قويماعان. وبلىستىق جانە اۋداندىق اكىمدىكتەردە دە سولاي بولىپ تۇر.

اۆتور: ارمان اسقاروۆ