مۇحتار قۇل-مۇحاممەد وڭتۇستىك قازاقستان دا مەملەكەتتىك باعدارلامالاردىڭ ورىندالۋ ساپاسىن تەكسەردى - فوتو
مۇحتار قۇل- مۇحاممەد الەۋمەتتىك ينفراقۇرىلىمنىڭ دامۋ بارىسىمەن تانىسىپ، جاڭادان سالىنعان جىلىجاي كەشەنى مەن الدىڭعى قاتارلى وندىرىستەردى ارالاپ، وبلىستىق پارتيا اكتيۆىمەن كەزدەسىپ، ءوڭىردىڭ جەتەكشى ۋنيۆەرسيتەتىندە بولدى، دەپ حابارلايدى اتالعان پارتيانىڭ وقو- داعى فيليالىنىڭ باسپا ءسوز قىزمەتى.
بيىلعى جىلى وڭتۇستىك قازاقستان وبلىسىنداعى پايدالانۋعا بەرىلگەن تۇرعىن ۇيلەردىڭ كولەمى ءبىر جارىم ەسەگە دەيىن ۇلعايدى. بۇل سالاداعى قارقىننىڭ دامۋىنا «نۇرلى جول» باعدارلاماسىنىڭ ارقاسىندا قول جەتكىزىلىپ وتىر.
«نۇر وتان» پارتياسى ءتوراعاسىنىڭ ءبىرىنشى ورىنباسارى شىمكەنتتەگى جىلدام ءوسۋ ۇستىندەگى اۋدانداردىڭ بىرىندە بولىپ، جاڭادان سالىنىپ جاتقان كوپ قاباتتى قۇرىلىستاردىڭ ساپاسىن باعالادى.
بيىلعى جىلى و ق و- دا بارلىعى 1140 پاتەر پايدالانۋعا بەرىلدى، ولاردىڭ جالپى كولەمى 64 مىڭ شارشى مەتردى قۇرايدى. مۇحتار قۇل- مۇحاممەد جەرگىلىكتى قۇرىلىسشىلاردى جاعىمدى جاڭالىقتان حاباردار ەتتى. ەلباسىنىڭ تاپسىرماسىمەن قازاقستاندا مەملەكەتتىك «نۇرلى جەر» جاڭا باعدارلاماسى ىسكە قوسىلادى. ياعني، ەلىمىزدەگى قۇرىلىس قارقىنى ەكى ەسە كوبەيەدى.
وڭتۇستىك قازاقستان وبلىسى تۇرعىندارىنىڭ سانى 2 ميلليون 800 مىڭنان اسىپ كەتتى. ەلىمىزدەگى حالقى ەڭ تىعىز ورنالاسقان وڭىردە بيىلعى جىلى جەتپىس ءۇش مىڭ بەس جۇزدەي بالدىرعان مەكتەپ تابالدىرىعىن اتتادى. بۇل وتكەن جىلعىمەن سالىستىرعاندا 25 مىڭعا ارتىق. سوندىقتان دا «نۇرلى جول» باعدارلاماسىنىڭ باسىم باعىتتارىنىڭ ءبىرى جاڭا مەكتەپ قۇرىلىستارىن سالۋ بولىپ تابىلادى. بيىلعى جىلى - 25 جاڭا مەكتەپ سالۋ كوزدەلگەن.
«نۇر وتان» پارتياسى ءتوراعاسىنىڭ ءبىرىنشى ورىنباسارى «دوستىق» مولتەكاۋدانىندا بولىپ، 1200 ورىندىق جاڭا مەكتەپ قۇرىلىسىنىڭ بارىسىن تەكسەردى. جىلدام ءوسىپ جاتقان مولتەكاۋداندا جاڭا ءبىلىم بەرۋ مەكەمەسىنىڭ اشىلۋىن شاكىرتتەر دە، ۇستازدار دا اسىعا كۇتۋدە. بالالاردىڭ كوپتىگىنەن جۇمىس ىستەپ جاتقان مەكتەپتە وقۋشىلار ءۇش اۋىسىممەن وقيدى.
و ق و ەلىمىزدەگى ەڭ ءىرى اۋىل شارۋاشىلىعى ورتالىقتارىنىڭ ءبىرى بولىپ تابىلادى. قازاقستانداعى جىلىجايلاردىڭ %87 وقو ورنالاسقان. ولاردىڭ جالپى كولەمى 1 مىڭ گەكتاردان اسادى. مۇحتار قۇل- مۇحاممەد ەلىمىزدەگى ەڭ ۇلكەن جانە الدىڭعى قاتارلى جىلىجاي كەشەنى - «ادەل» شارۋا قوجالىعىندا بولدى. بۇل شارۋاشىلىقتى وركەندەتۋ ءۇشىن ەكى جارىم ميللياردتان استام تەڭگە سالىنعان. جىل سايىن جىلىجايدان گوللانديالىق تەحنولوگيامەن 6 مىڭ توننا قيار مەن قىزاناق جينالادى. «اگروبيزنەس 2020» باعدارلاماسىنىڭ ارقاسىندا وسىنداي اۋقىمدى جوبانى ىسكە اسىرۋ مۇمكىندىگى تۋدى. پارتيا ءتوراعاسىنىڭ ءبىرىنشى ورىنباسارى جەرگىلىكتى شارۋالارعا مەملەكەتتىڭ اگرووندىرىس كەشەنىنە كورسەتەتىن كومەكتى ودان ءارى ۇلعايتا بەرەتىنىن ايتتى. الايدا، اۋىل شارۋاشىلىعىنىڭ وزىق تەحنولوگيالارىن قولدانىپ، جەرگە ۇقىپپەن قارايتىن شارۋالارعا عانا كومەك بەرۋ مۇمكىندىگى قاراستىرىلعان.
مۇحتار قۇل-مۇحاممەد قازاقستاننىڭ وڭتۇستىگىندە شاعىن جانە ورتا بيزنەستىڭ دامىتۋ ماسەلەلەرىنە ايرىقشا كوڭىل ءبولدى. بۇگىنگى تاڭدا وڭىردە 330 مىڭنان استام كاسىپكەر بار. دەگەنمەن، وبلىس ەكونوميكاسىنداعى شاعىن جانە ورتا بيزنەستىڭ ۇلەسى 20 پايىزعا دە جەتپەيدى.
«نۇر وتان» پارتياسى ءتوراعاسىنىڭ ءبىرىنشى ورىنباسارى ءوز سوزىندە ەلباسىنىڭ تاۋەلسىزدىكتىڭ العاشقى كۇندەرىنەن باستاپ شاعىن جانە ورتا بيزنەستى دامىتۋعا ەرەكشە كوڭىل ءبولىپ، ونىڭ جالپى ۇلتتىق ەكونوميكامىزداعى ۇلەسىن 50 پايىزعا جەتكىزۋگە ۇدايى ءوڭىر باسشىلارىنىڭ نازارىن اۋدارىپ كەلە جاتقانىن اتاپ ءوتتى.
«وڭتۇستىك قازاقستان وبلىسىنىڭ تاپ وسى سەگمەنتتى دامىتۋعا تولىق مۇمكىندىگى بار. ونىڭ ۇستىنە «نۇرلى جول»، «بيزنەستىڭ جول كارتاسى» ونى ىسكە اسىرۋعا كەرەمەت جاعداي تۋعىزىپ وتىر. بۇل مۇمكىندىكتى پايدالانا ءبىلۋ كەرەك»، - دەپ اتاپ ءوتتى مۇحتار قۇل- مۇحاممەد.
«نۇر وتان» پارتياسى ءتوراعاسىنىڭ ءبىرىنشى ورىنباسارى وڭتۇستىك قازاقستاننىڭ، سول سياقتى بۇكىل ەلىمىزدىڭ بارلىق بيزنەسمەندەرى ءۇشىن مىسال رەتىندە جوعارى ساپالى شىنى ىدىستار شىعاراتىن «ەۋروكريستالل» زاۋىتىن اتادى. ول زاۋىت «2020 جول كارتاسى بيزنەسى» مەملەكەتتىك باعدارلاما شەڭبەرىندە سالىندى. كاسىپورىننىڭ قۇنى - 5 ميلليارد تەڭگە. شۆەيتساريالىق تەحنولوگيامەن سالىنعان. ءوندىرىس قۋاتى جاعىنان رەسپۋبليكادا ەكىنشى ورىن الادى. مۇندا جىلىنا 210 ميلليون بانكىلەر مەن بوتەلكەلەر شىعارىلادى. جەرگىلىكتى ءونىم سۋعا، حيميالىق زاتتارعا اسا توزىمدىلىگىمەن، ايتارلىقتاي بەرىكتىگىمەن، ەتالوندىق رەڭىمەن جانە ءمىنسىز گەومەترياسىمەن ەرەكشەلەنەدى.
مۇحتار قۇل- مۇحاممەد ءوندىرىس ۇدەرىسىمەن تانىسا وتىرىپ، جۇمىسشىلارمەن اڭگىمەلەسۋ كەزىندە قازاقستاندىق وندىرۋشىلەردىڭ جەرگىلىكتى ءونىم وتكىزۋ نارىعىمەن شەكتەلىپ قالماۋى ءتيىس ەكەندىگىن باسا ايتتى. ەكسپورتتى دامىتۋ كاسىپورىندارعا ءوندىرىس كولەمىن ۇنەمى كەڭەيتۋگە، ارتتىرۋعا جانە جاڭا جۇمىس ورىندارىن اشۋعا، سويتە وتىرىپ، ەل ەكونوميكاسىن نىعايتۋعا جانە ونىڭ شيكىزات سەكتورىنا تاۋەلدىلىگىن تومەندەتۋگە مۇمكىندىك بەرەدى.
«نۇر وتان» پارتياسى ءتوراعاسىنىڭ ءبىرىنشى ورىنباسارى وبلىس اكتيۆىمەن كەزدەسۋ بارىسىندا مەملەكەت باسشىسى بەلگىلەگەن رەسپۋبليكانى دامىتۋدىڭ باسىم باعىتتارى تۋرالى جان- جاقتى بايانداپ بەردى. مۇحتار قۇل- مۇحاممەد پرەزيدەنتتىڭ پارتيا الدىنا قويعان باستى مىندەتتەرىنىڭ ءبىرى - نەگىزگى مەملەكەتتىك باعدارلامالاردى ىسكە اسىرۋدىڭ ساپاسىنا قاتاڭ باقىلاۋدى قامتاماسىز ەتۋ، - ەكەندىگىن ەسكەرتتى. ەڭ الدىمەن، بۇل تەڭدەسى جوق «نۇرلى جول» باعدارلاماسىن ينفراقۇرىلىمدىق دامىتۋدى قامتۋعا قاتىستى. اكتيۆ جيىنى بارىسىندا وڭتۇستىك قازاقستان وبلىستىق پارتيا فيليالىنىڭ ءتوراعاسى بولىپ جانسەيىت تۇيمەبايەۆ سايلاندى.
سونداي- اق، اكتيۆ جيىنىنان سوڭ «نۇر وتان» پارتياسى ءتوراعاسىنىڭ ءبىرىنشى ورىنباسارى شىمكەنتتە وڭتۇستىك قازاقستان مەملەكەتتىك ۋنيۆەرسيتەتىنىڭ پروفەسسورلىق- وقىتۋشىلىق قۇرامىمەن جانە ستۋدەنتتەرىمەن كەزدەسۋ وتكىزەدى.
