مينيستر بۇكىل پوليتسيانى قىزمەتىنەن بوساتىپ، جاڭادان كادر ىرىكتەۋگە دايىن
بۇل تۋرالى بۇگىن ق ر پارلامەنتى سەناتىندا ءوتىپ جاتقان «جول قوزعالىسى سالاسىنداعى قۇقىقتىق رەتتەۋدىڭ جاي- كۇيى مەن پروبلەمالارى» تاقىرىبىنداعى پارلامەنتتىك تىڭداۋ بارىسىندا ەلىمىزدىڭ ىشكى ىستەر ءمينيسترى قالمۇحانبەت قاسىموۆ ءمالىم ەتتى، دەپ حابارلايدى قازاقپارات.
پارلامەنتتىك تىڭداۋ بارىسىندا سەناتور سەرگەي ەرشوۆ مينيستردەن جول پوليتسياسى اراسىنداعى جەمقورلىقتىڭ جوعارى ەكەندىگىن ايتىپ، ونى تومەندەتۋ ءۇشىن قانداي شارالار قولعا الىناتىندىعىن سۇراعان ەدى.
«قازىر ءبىز گرۋزيادا جەمقورلىقپەن كۇرەس جاقسى جۇرگىزىلىپ جاتقاندىعى جايىندا ءجيى وقيتىن بولدىق. سىزدەر تاراپىنان گرۋزيا تاجىريبەسى زەردەلەندى مە جانە ول قىزىقتى ما ءارى بىزدە دە قولدانۋعا بولا ما؟» - دەدى سەناتور قاسىموۆقا قاراتا.
«گرۋزياعا ءبىزدىڭ قىزمەتكەرلەر بىرنەشە مارتە باردى، بارلىق قىزمەتتەر كوميسسيا بولىپ تا بارىپ قايتتى. ول جاقتاعىلار پوليتسيا قىزمەتكەرلەرىنىڭ ءبارىن جۇمىستان شىعارىپ جىبەرىپ، ايلىقتى 2 ەسە كوتەرگەن. سودان كەيىن جاڭادان جۇمىسقا العان. مارحابات. ءبىز مۇنداي قادامعا بارۋعا دايىنبىز»، - دەدى مينيستر.
سونىمەن قاتار ول قازاقستان پوليتسياسىن گەرمانياداعىداي، امەريكاداعىداي جاساۋ قاجەت دەگەن پىكىردىڭ ءجيى ايتىلاتىندىعىن اتاپ ءوتتى.
«ءبىز بۇل تاجىريبەلەردىڭ بارلىعىن زەردەلەدىك. مەنىڭشە، گەرمانيالىق، امەريكالىق پوليتسەيلەردىكىندەي جالاقى، تەحنيكامەن جانە مۇمكىنشىلىكتەرمەن قامتاماسىز ەتەر بولساق، وندا بىزدە ءدال سونداي ناتيجەگە قول جەتكىزە الامىز»، - دەدى قاسىموۆ.
اۆتور: مارلان جيەمباي
