نۇرسۇلتان نازاربايەۆ: لاڭكەستىك پەن مۇسىلماندىقتى تەڭ قاراۋعا بولمايدى
سۇحبات بارىسىندا تەلەارنا ءتىلشىسى ق ر پرەزيدەنتىنەن: «ءوزىڭىز اتاپ وتكەندەي، سيريا ماسەلەسى وتە كۇردەلى. ءالى شەشىمىن تاپقان جوق. ءسىزدىڭ ويىڭىزشا، سيرياداعى داعدارىس جاقىن ارادا ءوز شەشىمىن تابا ما الدە ۇزاققا سوزىلا ما؟ » - دەپ سۇرادى.
بۇل ساۋالعا وراي مەملەكەت باسشىسى سيريا داعدارىسىن شەشۋ ءۇشىن بارلىق مۇددەلى مەملەكەتتەر كەلىسىپ، ءبىر جەردەن ءسوز شىعارۋ قاجەتتىگىن، سول ارقىلى عانا ناقتى ناتيجەگە قول جەتكىزۋگە بولاتىنىن باسا ايتتى.
«اسىرەسە، ارالاسىپ جاتقان ۇلكەن مەملەكەتتەر. وكىنىشكە وراي، ءارقايسىسى وزدەرىنىڭ مۇددەسىن قالاپ، ءار ءتۇرلى جاعدايمەن كىرىسەدى. ءارقايسىسىنىڭ ىشىندە ءوز مۇددەسى بار. لاڭكەستىككە قاتىسىپ جۇرگەن ادامدار سونى قولدانادى. بىرىنە ءبىرىن قارسى قويادى. سول قايشىلىقتان وزدەرىنە ورىن تابادى. سوندىقتان، مەنىڭ ۇسىنىسىم - ب ۇ ۇ اياسىندا بۇكىل دۇنيەجۇزىلىك قوعامداستىق بىرلەسىپ لاڭكەستىككە قارسى تۇرىپ، سيريانىڭ ماسەلەسىن شەشۋى كەرەك. باسقا جول جوق دەپ سانايمىن. سەبەبى، بۇل بارلىق مەملەكەتتەرگە قاۋىپ. ءبىزدى بىلمەيتىن باسقا دۇنيە، باتىس ەلدەرى مۇنىڭ بارلىعى مۇسىلمانداردان شىعىپ وتىر دەپ ويلايدى. لاڭكەستىك پەن مۇسىلماننىڭ اراسىندا ەشقانداي دا تەڭدىك جوق. بارلىق ەلدەر بىرىگىپ قارسى شىقسا ونى جەڭۋگە بولادى» ، - دەدى نازاربايەۆ.
