ساعىنتايەۆ اۋىلدىق جەرلەردى تازا اۋىز سۋمەن قامتۋدىڭ ءتيىمدى جولىن ايتتى
«مەنىڭ ويىمشا، جاقسى تالقىلاۋ بولدى. ويتكەنى، اۋىز سۋ - كۇن تارتىبىندە تۇرعان وزەكتى ماسەلە. جوعارىدا ايتىپ وتكەندەي، اۋىز سۋ ماسەلەسى ەلباسىنىڭ تىكەلەي باقىلاۋىندا تۇر. اسىرەسە، اۋىلدىق جەرلەردەگى ەلدى مەكەندەردى سۋمەن قامتاماسىز ەتۋ - كۇردەلى ماسەلە. ونى شەشۋ جولدارى بار. ونى ءبىز قاراستىرىپ جاتىرمىز. دەگەنمەن، قازىرگى الەمدەگى ەكونوميكالىق جاعدايعا بايلانىستى كەزىندە «اق بۇلاق» باعدارلاماسىن باستاعان كەزدە بولىنگەن قارجى كولەمى بيۋدجەتتى سەكۆەسترلەۋ جاساعان كەزدە قىسقارتىلعان بولاتىن. وسىعان وراي ەلدى مەكەندەردى سۋمەن قامتاماسىز ەتۋگە بولىنەتىن قارجى كولەمى ءبىراز تومەن ءتۇستى»، - دەدى ۇكىمەت باسشىسى.
دەگەنمەن ساعىنتايەۆتىڭ ايتۋىنشا، اقشا كولەمىنىڭ قىسقارعانىنا قاراماستان سوڭعى 3-4 جىلدىڭ ىشىندە اۋىلدىق جەرلەردەگى ەلدى مەكەندەردى سۋمەن قامتاماسىز ەتۋ بۇرىنعى 42 پايىزدان 51 پايىزعا دەيىن كوتەرىلدى. قالالىق جەردە 87 پايىزعا دەيىن ارتتى.
«بۇل - جاقسى كورسەتكىش. دەگەنمەن، جاعداي سولاي ەكەن دەپ قاراپ قالماۋىمىز كەرەك. ماسەلە قوسىمشا قارجى كوزىن ىزدەۋدە ەمەس سول باعدارلاما ىشىنەن قاراپ، ءتيىمسىز پايدالانىلىپ جاتقان قارجىنى دۇرىس جولعا كوشىرۋدە. جوبانى جاساعان كەزدە جىبەرگەن ءبىرقاتار ولقىلىقتارىمىز دا بار. سونىڭ ءبارىن دۇرىستاپ قاراساق قوماقتى قارجى شىعادى»، - دەدى ول.
پرەمەر- مينيستر حالىق اۋىز سۋدى ەڭ ءبىرىنشى كەزەكتە اكىمدەردەن سۇرايتىندىعىن، سوندىقتان بۇل ماسەلەگە جەرگىلىكتى جەردەن دە قارجى ءبولىنۋى تيىستىگىن باسا اتادى.
«ۇكىمەت تاراپىنان قارجى بەرىلسە، وندا اكىمدىك تاراپىنان دا سۋعا قارجى بولگەن دۇرىس دەپ ويلايمىن. ماسەلەن، كەزىندە 2007 -جىلدان باستاپ جەرگىلىكتى جولداردى سالۋ كەزىندە ۇكىمەت تاراپىنان بەرىلگەن اقشاعا قوسىمشا جەرگىلىكتى جەرلەردەن دە قارجى ءبولىندى. ياعني، جەرگىلىكتى جەردەن قانشا قارجى بولىنسە، سونشا كولەمدە رەسپۋبليكادان دا ءبولىنىپ وتىردى. بۇل اكىمدەردى ىنتالاندىرۋ ءۇشىن جاسالعان ەدى. ءبىز ەكى جاقتاپ قارجى ءبولىپ وتىرساق سۋمەن قامتاماسىز ەتىلمەي وتىرعان 48 پايىز ەلدى مەكەننىڭ ءبارىن جىلدام ۋاقىتتا سۋمەن قامتاماسىز ەتۋگە مۇمكىندىك بولادى»، - دەدى ساعىنتايەۆ.
اۆتور: مارلان جيەمباي
