كەلىن بولۋدىڭ نەگىزگى ادەپتەرى قانداي؟
قالىڭدىق بولاشاق كۇيەۋىنىڭ نەگىزگى قاسيەتتەرىن ءبىلۋى شارت: مىنەز- قۇلقىن، ادەت- داعدىلارىن، وي ءورىسى مەن مادەنيەتىن، ءبىلىمى مەن يناباتتىلىق بولمىسىن، تالابى مەن تالعامىن، دەنساۋلىعىن، جاقسى- جامان ادەتتەرىن (تەمەكى، ىشىمدىك، ەسىرتكىگە زاۋقى)، الا- بوتەن قىلىقتارىن ت. ب جايتتاردى ءبىلۋى وتە ماڭىزدى.
كەلىننىڭ بويىندا بولاتىن نەگىزگى ءتيىستى قاسيەتتەر:
سىپايىلىق؛
مەيىرباندىق؛
ادالدىق؛
سەزىمتالدىق؛
ەڭبەكققورلىق؛
جاۋاپكەرشىلىك؛
اشىق قاباقتىلىق؛
ءدامدى تاماق ازىرلەي ءبىلۋى؛
وتىرىك ايتپاۋ؛
ءوز ەر ازاماتىنا دەگەن قامقورلىعى؛
ءوز ەنەسىن اناسىنداي قۇرمەتتەۋ كەرەك.
كەرەك كەڭەس:
ەنەگە دەگەن قارىم- قاتىناسىڭىزدى تۇزەتكىڭىز كەلسە، ءبىرىنشى وزىڭىزگە دەگەن قارىم- قاتىناستى دۇرىستاۋىڭىز قاجەت. ءسىز ءوزىڭىزدى سىيلاساڭىز وزگەنى دە قۇرمەتتەيسىز! ەنەگە دەگەن قۇرمەتىڭىزبەن، اشىق جۇرەگىڭىزبەن ءاردايىم جىلى سوزدەن باستاپ، سىيلىقتارعا قۇشاعىن تولتىرا ءبىلىڭىز.
ەنەسىن جامان كورەتىن قىز- كەلىنشەكتەر ءبىرىنشى ءوز قاتەلەرىن ويلاۋى كەرەك، مۇمكىن مەن دۇرىس ارەكەت جاساماعان بولارمىن دەگەن سۇراقتار قويا بىلگەنى ابزال. ەشقانداي ەنە ءوز كەلىنىنە جامان بولسىن دەپ ۇرىسپايدى. قاتەنى تۇزەتۋگە تىرىسىڭىز، مۇمكىن ەنەڭىز دە ءوز قاتەسىن تۇسىنەر. ۋاقىتتى كۇتپەڭىزدەر، كىشىپەيىل بولىڭىزدار.
بولاشاق كەلىننىڭ قولىنان ءىس كەلۋى مىندەتتى جاعداي. «سالاق ايەلدىڭ ۇيىنەن ساباقتى ينە تابىلمايدى»، «ولاق ايەل ويماقشىل»، «جىبەكتى تۇتە بىلمەگەن ءجۇن ەتەدى» ، «ولاقتان سالاق جامان»، «انا كورگەن تون پىشەر»، «قىز ەركەم كەستەسىمەن كوركەم»، ت. ب ماقالدار سونى بىلدىرەدى.
قىسقاسى، كەلىننىڭ كەلۋىمەن وتباسىندا ونىڭ اسەرى سەزىلەر بولسىن. كەلىننىڭ قولىنان تاتقان تاماق، ىشكەن شاي باپتى، ءدامدى كورىنسىن. ءۇيدىڭ ءىشى دە بۇرىنعىدان گورى ادەمى، ىدىس- اياق تا بۇرىنعىدان گورى تازا، توڭىرەك تە بۇرىنعىدان گورى جيناقى رەتتى بولسىن. كەلگەن- كەتكەن « كەلىنى جاقسى ءۇيدىڭ كەرەگەسى التىن، دەگەن راس- اۋ» دەسىن.
دەرەككوزدەر: ۇ. اسىلوۆ، ج. نۇسقاباي ۇلى، ادەپ تانۋ
