داۋرەن ابايەۆ قىزىلقاق تۇرعىندارىنىڭ جاپپاي سوققىعا جىعىلۋىنا وراي پىكىر ءبىلدىردى

استانا. قازاقپارات - پاۆلودار وبلىسىنىڭ  قىزىلقاق اۋىلى تۇرعىندارىنىڭ جاپپاي سوققىعا جىعىلۋىن بەيكۇنا اۋىلدىقتاردىڭ تاياق جەۋى دەپ ءبىرجاقتى باعالاۋعا بولمايدى.

بۇل پىكىردى بۇگىن ۇكىمەت وتىرىسىنان كەيىنگى بريفينگتە ق ر اقپارات جانە كوممۋنيكاتسيالار ءمينيسترى داۋرەن ابايەۆ ءبىلدىردى.

 «مەنىڭشە، تاياۋ ۋاقىتتا بارلىعىن دا ەگجەي- تەگجەيلى بىلەتىن بولاسىزدار. سىزدەر ايتىپ تۇرعانداي بارلىعى دا ءبىرجاقتى ءارى قاراپايىم ەمەس ەكەندىگىنە سەندىرگىم كەلەدى. بۇل جايتقا بايلانىستى بەلگىلى ءبىر تەرگەۋ شارالارى جۇرگىزىلىپ جاتىر. شىدامدىلىق كەرەك جانە سىزدەر تولىق ءمان- جايدى بىلەتىن بولاسىزدار»، - دەدى ول ب ا ق وكىلدەرىنىڭ ساۋالىنا وراي.

 ەستەرىڭىزگە سالا كەتسەك، ءدال وسى وقيعاعا بايلانىستى ق ر ىشكى ىستەر ءمينيسترى قالمۇحانبەت قاسىموۆ پىكىر بىلدىرۋدەن باس تارتقان بولاتىن.

ەستەرىڭىزگە سالا كەتسەك، پاۆلودار وبلىسىنىڭ ىشكى ىستەر دەپارتامەنتى 14 - قىركۇيەك كۇنى قىزىلقاق اۋىلىندا ورىن العان قۇقىق قورعاۋشىلارمەن جەرگىلىكتى تۇرعىندار اراسىنداعى «توبەلەسكە» قاتىستى تۇسىنىكتەمە بەرگەن بولاتىن. جەرگىلىكتى بۇقارالىق اقپارات قۇرالدارىنا سۇحبات بەرگەن وبلىستىق ءى ءى د باسشىسىنىڭ ءبىرىنشى ورىنباسارى نازىمبەك ءجۇنىسوۆ بۇل وقيعاعا قاتىستى ويىن ايتتى.

ونىڭ دەرەگىنە سۇيەنسەك، ەرتىس اۋدانىنداعى تۇزدى كولدى تەكسەرۋ ءۇشىن ۇيىمداسقان قىلمىسقا قارسى كۇرەس باسقارماسى مەن جەدەل ارەكەت ەتەتىن جاساق قىزمەتكەرلەرى وقيعا ورنىنا اتتانعان. ن. ءجۇنىسوۆتىڭ ايتۋىنشا، 11 - قىركۇيەك كۇنى قىزىلقاق كولىنىڭ ماڭىندا اشۋعا بۇلىققان اۋىل تۇرعىندارى كولدەگى ارتەميا شايانىن اۋلاۋعا ەركىن رۇقسات بەرۋدى تالاپ ەتكەن.

«اۋىل تۇرعىندارىنا بۇل ارەكەتتىڭ زاڭسىز ەكەنى ايتىلعان. الايدا، اۋىل تۇرعىندارىنان قۇرالعان ءبىر توپ ادام شايان اۋلاۋىن توقتاتپاعان. 14 - قىركۇيەك كۇنى اۋدانعا پوليتسيانىڭ قوسىمشا كۇشى جىبەرىلدى. قىزىلقاق اۋىلىنا بارعاندا، پوليتسيانىڭ الدىنان 20-25 ادام شىعىپ، قۇقىق قورعاۋشىلاردى«قورقىتىپ»، كولدەگى كۇزەتتى الىپ تاستاۋ تۋرالى ۋلتيماتۋم قويعان. پوليتسيا ولاردى قولعا تۇسىرەردە، ءبىر ادام قاشىپ كەتىپ، تىعىلۋعا تىرىسقان. ونى ۇستاۋ بارىسىندا سامبو ءادىسى قولدانىلدى. ەكىنشى ادام موتوتسيكلىنە ءمىنىپ قاشپاققا ارەكەتتەنگەندە موتوتسيكلىنەن قۇلاپ، جاراقات الدى»، - دەپ ءتۇسىندىردى وبلىستىق ءى ءى د باسشىسىنىڭ ورىنباسارى.