ەلباسى اۋىل شارۋاشىلىعى ۋنيۆەرسيتەتتەرى بازاسىندا عىلىمي-زەرتتەۋ ينستيتۋتتارىن قۇرۋ قاجەتتىگىن اتاپ ءوتتى

استانا. قازاقپارات - مەملەكەت باسشىسى نۇرسۇلتان نازاربايەۆ اقمولا وبلىسىنا جۇمىس ساپارىمەن باردى، دەپ حابارلايدى اقوردانىڭ باسپا ءسوز قىزمەتى.

ساپار اياسىندا ەلباسى شورتاندى اۋدانىنىڭ اۋىل شارۋاشىلىعى القابىندا بولىپ، وندا «جاكەن-1» ج ش س مەحانيزاتورلارىمەن كەزدەستى جانە جيىن-تەرىن ناۋقانىنىڭ بارىسىمەن تانىستى.

قازاقستان پرەزيدەنتىنە كاسىپورىننىڭ نەگىزگى جۇمىس باعىتتارى مەن وڭىردەگى اگرارلىق سەكتوردى قولداۋ شارالارى تۋرالى باياندالدى.

نۇرسۇلتان نازاربايەۆ وڭىردە وسەتىن اۋىل شارۋاشىلىعى ونىمدەرى كورمەسىن ارالادى، وندا جەرگىلىكتى جاعدايعا بەيىمدەلگەن ءبيدايدىڭ جاڭا ءتۇرى تانىستىرىلدى.

مەملەكەت باسشىسى جينالعاندارعا ارناعان سوزىندە رەسپۋبليكانىڭ اگروونەركاسىپ كەشەنىنىڭ ونىمدىلىگىن ارتتىرۋ ءۇشىن اۋىل شارۋاشىلىعى ۋنيۆەرسيتەتتەرى بازاسىندا عىلىمي-زەرتتەۋ ينستيتۋتتارىن قۇرۋ قاجەتتىگىن اتاپ ءوتتى.

بۇدان بولەك، قازاقستان پرەزيدەنتى وبلىستىڭ اۋىل شارۋاشىلىعى تاۋارىن وندىرۋشىلەرىمەن كەزدەستى، ولار استىق جيناۋ بارىسى، مال شارۋاشىلىعى سالاسىنىڭ دامۋ قارقىنى تۋرالى ايتىپ بەردى.

اڭگىمەلەسۋ كەزىندە استىق جيناۋ ناۋقانىن تابىستى وتكىزۋ وبلىس شارۋالارىنىڭ الدىندا تۇرعان ەڭ الدىڭعى كەزەكتەگى مىندەتتىڭ ءبىرى بولىپ سانالاتىنى اتاپ ءوتىلدى.

نۇرسۇلتان نازاربايەۆ قىتايعا جانە وزبەكستانعا تاياۋداعى ساپارلارى اياسىندا قازاقستان استىعىن، مايلى داقىلدار مەن ەت ءونىمىن ەكسپورتتاۋعا قاتىستى ءبىرقاتار ماڭىزدى كەلىسىمدەرگە قول جەتكىزىلگەنىنە ايرىقشا نازار اۋداردى.

مەملەكەت باسشىسىنا شارۋالار ەلدىڭ اۋىل شارۋاشىلىعى سالاسىنا ۇدايى كوڭىل ءبولىپ، قولداۋ كورسەتىپ وتىرعانى ءۇشىن العىس ايتتى.