تولەشوۆتىڭ ىسىنە قاتىستى ادۆوكاتتاردىڭ ءبارى قۇپيالىقتى تاراتپاۋ تۋرالى ءتىلحاتقا قول قويعان
بۇل تۋرالى قازاقپارات تىلشىسىنە سوت وتىرىسىنىڭ ۇزىلىسىندە فيگۋرانتتاردىڭ ءبىرى، ياعني، «شىمكەنت سىرا» زاۋىتى ديرەكتورىنىڭ ورىنباسارى بولعان ۆيكتور رۋليەۆسكيدىڭ ادۆوكاتى اسانبەك بەردىبەكوۆ ءمالىم ەتتى.
«قىلمىستىق ىستەر جونىندەگى مامانداندىرىلعان اۋدانارالىق اسكەري سوتتا قارالىپ جاتقان توقتار تولەشوۆ پە باسقالاردىڭ سوتىنا قاتىسىپ جاتىرمىن. مەن «شىمكەنت سىرا» زاۋىتى ديرەكتورىنىڭ ورىنباسارى بولعان ۆيكتور رۋليەۆسكيدىڭ ادۆوكاتىمىن. سوتتىڭ بۇگىن ءبىرىنشى كۇنى. سوت باستالماي تۇرىپ سۋديا بۇل ءىستىڭ جابىق، قۇپيا تۇردە وتەتىنىن ەسكەرتتى. 25 فيگۋرانتتىڭ ادۆوكاتتارىنىڭ بارلىعى ءىس بارىسىنا قاتىستى تۇسىندىرمە بەرمەۋ تۋرالى ءتىلحاتقا قول قويدىق. ياعني، قانداي دا ءبىر تۇسىندىرمە بەرۋگە ءبىزدىڭ قۇقىمىز جوق»، - دەيدى ا. بەردىبەكوۆ.
ا. بەردىبەكوۆتىڭ ايتۋىنشا، اتى شۋلى قىلمىستىق ءىس 300 تومنان تۇرادى، 150 گە جۋىق كۋاگەر سۇرالادى. سوندىقتان، سوت كەمىندە 2-3 ايعا سوزىلۋى ابدەن مۇمكىن، دەيدى ول. سوت وتىرىسى كۇندە ساعات 10:00-18:00 ارالىعىندا وتەدى.
توقتار تولەشوۆ «شىمكەنت سىرا» زاۋىتىنىڭ بۇرىنعى يەسى ەدى. 2016-جىلدىڭ قاڭتارىندا شىمكەنتتە كۇش قۇرىلىمدارى ارنايى وپەراتسيا جۇرگىزىپ، ونى قولعا تۇسىرگەن بولاتىن. ارادا التى اي وتكەن سوڭ، ياعني، ماۋسىم ايىندا ۇلتتىق قاۋىپسىزدىك كوميتەتى رەسمي مالىمدەمە جاساي وتىرىپ، توقتار تولەشوۆكە قاراجاتى مەن لاۋازىمىن پايدالانا وتىرىپ، بيلىكتى كۇشپەن باسىپ الۋعا ارەكەتتەندى دەگەن ايىپ تاقتى. بۇل ويىن جۇزەگە اسىرۋ ءۇشىن توقتار تولەشوۆ قۇزىرلى ورگاندار مەن اسكەري سالاداعى ۆەدومستۆولاردان سىبايلاستار تاپقان ەكەن. جالپى، وسى قىلمىستىق ىستە 25 فيگۋرانت بار.
قىلمىستىق ىستەگى باستى جاۋاپكەر توقتار تولەشەۆ ءبىرقاتار قىلمىستار بويىنشا ايىپتالىپ وتىر، ولاردىڭ اراسىندا: ادام ۇرلاۋ، ءولتىرۋ، زاڭسىز بوستاندىعىنان ايىرۋ، بيلىكتى باسىپ الۋعا جاريا شاقىرۋ، سونداي-اق بيلىكتى باسىپ الۋ نەمەسە ق ر كونستيتۋتسيالىق قۇرىلىسىن كۇشتەپ وزگەرتۋ، ەكسترەميستىك توپ قۇرۋ، وعان باسشىلىق ەتۋ نەمەسە ونىڭ قىزمەتىنە قاتىسۋ، توناۋشىلىق، ۇيىمداسقان قىلمىستىق توپ، ۇيىم قۇرۋ جانە وعان باسشىلىق ەتۋ سياقتى ايىپتار تاعىلعان.
سونداي-اق ول قارۋلاردىڭ، وق-دارىلەردىڭ، جارىلعىش زاتتاردىڭ جانە جارىلعىش قۇرىلعىلاردىڭ زاڭسىز اينالىمىنا ايىپتالۋدا.
سونىمەن بىرگە. تولەشوۆتىڭ وتكىزۋ ماقساتىنسىز ەسىرتكى زاتتارىنىڭ زاڭسىز اينالىمىنا قاتىسى بار ەكەندىگى جونىندە ايىپ تاعىلۋدا.
اۆتور: كەنجەكەي توقتامۇرات قىزى
