قۇربان ايت كەزىندە حالقىمىز مەيىرباندىقپەن، بۇكىل جۇرتقا جاقسىلىق تىلەگەن - ن. نازاربايەۆ
«قۇرمەتتى مۇسىلمان قاۋىم! بۇگىن جەر شارىنداعى بۇكىل مۇسىلماندار قاۋىمى قاسيەتتى مەرەكە - قۇربان ايتتى اتاپ ءوتىپ جاتىر. بۇل دىننەن دە، اتا- بابامىزدان دا ءداستۇر الىپ كەلە جاتقان اللانىڭ، پايعامبارىمىزدىڭ قالدىرىپ كەتكەن وسيەتى. قۇربان ايت كەزىندە قازاق جۇرتى مەيىرباندىق، تۋىستىق، تانىستىق، ءبىر- بىرىمەن كورىسىپ، كەشىرىسىپ، بۇكىل جۇرتقا، حالىققا جاقسىلىق تىلەيدى. وتباسىنىڭ بەرەكەسىنە، ەلدىڭ تىنىشتىعى ءۇشىن قۇربان شالىپ، ناماز وقيدى. سونىڭ ءبارى اللانىڭ قۇلاعىنا شالىنىپ، ەلىمىز امان، جۇرتىمىز تىنىش بولسىن. قۇراندا: "مۇسىلماندار بولىنبەۋ كەرەك، بولشەكتەنبەۋ كەرەك"، دەگەن ءسوز بار. سوندىقتان بۇگىنگى قيىن- قىستاۋ جاعداي بولىپ جاتقاندا مۇسىلمانداردىڭ، ەلدىڭ بىرلىگى اسا كەرەك. ءبىز بيىل ەلىمىزدىڭ 25 -جىلدىق تاۋەلسىزدىگىن اتاپ ءوتىپ جاتىرمىز. سول 25 -جىلدىققا بەرەكە- بىرلىكتىڭ ارقاسىندا جەتتىك. قۇراندا جازىلعان: "مۇسىلمان جۇرتى ەلدى ۇلىسقا، ۇلتقا ەشقاشان بولمەيدى. بارلىعى ءدىندى بىردەي كورەدى. سول بىرلىك ءبىزدى العا قاراي الىپ كەلە جاتىر. ءار ۋاقىتتا دا اللا جار بولىپ، قولداپ، ەلىمىزدىڭ، قازاعىمىزدىڭ بولاشاعىن باياندى قىلسىن!"، - دەدى ەلباسى.
ايتا كەتەيىك، قۇربان ايت - كۇللى مۇسىلمان جۇرتىنىڭ ۇلىق مەيرامى. بۇل مەرەكەدە ەكى امال ورىنداۋ شارت: ايت نامازىن وقۋ مەن قۇربان شالۋ. بيىل قالا بويىنشا قۇربان شالۋ ءراسىمى ارنايى بەلگىلەنگەن 8 ورىندا وتۋدە. ءار ورىندا قاساپشىلار مەن دۇعا جاسايتىن يمامدار بار. قۇربان ايتتىڭ ءۇش كۇنىندە رەنجىسكەندەرمەن تاتۋلاسىپ، جاستار ۇلكەندەردىڭ ۇيلەرىنە سالەم بەرە بارسا، مولىنان ساۋاپ الادى دەلىنەدى.
