نازاربايەۆ بارشا قازاقستاندىقتاردى وتباسى كۇنىمەن قۇتتىقتادى

استانا. قازاقپارات - ق ر پرەزيدەنتى نۇرسۇلتان نازاربايەۆ «مەرەيلى وتباسى» ۇلتتىق بايقاۋىنىڭ جەڭىمپازدارى مەن بارشا قازاقستان حالقىن وتباسى كۇنىمەن قۇتتىقتادى.

ەلباسى قۇتتىقتاۋىن بۇگىن «قازاقستان» ورتالىق كينوكونتسەرت زالىندا ءوتىپ جاتقان بايقاۋ جەڭىمپازدارىن ماراپاتتاۋ راسىمىندە ق ر مەملەكەتتىك حاتشىسى گۇلشارا ءابدىقالىقوۆا وقىپ بەردى.

 «مەرەيلى وتباسى» ۇلتتىق كونكۋرسىنىڭ جەڭىمپازدارىن ماراپاتتاۋ راسىمىنە قاتىسۋشىلارعا! قىمباتتى قازاقستاندىقتار، قۇرمەتتى كونكۋرسقا قاتىسۋشىلار! بارشاڭىزدى وتباسى كۇنىمەن شىن جۇرەكتەن قۇتتىقتايمىن! وسىناۋ ايتۋلى كۇنى «مەرەيلى وتباسى» ۇلتتىق كونكۋرسى ءوز مارەسىنە جەتتى. مەنىڭ باستامامەن قولعا الىنعان كونكۋرس از عانا ۋاقىتتا جالپى حالىقتىق جاراسىمدى شاراعا اينالدى. بيىل بۇل بايقاۋ - قازاقستان رەسپۋبليكاسى تاۋەلسىزدىگىنىڭ 25 جىلدىق مەرەيلى بەلەسىنىڭ اياسىندا وتكىزىلۋدە. كونكۋرسقا كوپتەگەن قازاقستاندىق وتباسىلار ءتۇرلى ماماندىق يەسى مەن اتا كاسىپتەرىن ۇرپاقتان- ۇرپاققا ميراس ەتكەن ەڭبەك اۋلەتتەرى قاتىستى. ولاردىڭ بارلىعى دا شىنايى قۇرمەت پەن مارتەبەلى ماداققا يە. شاڭىراعى بيىك، بوساعاسى بەرىك قازاقستاندىق وتباسى قوعامنىڭ تۇراقتى دامۋىنىڭ جانە مەملەكەتتىڭ ءوسىپ- وركەندەۋىنىڭ بۇلجىماس كەپىلى. ادام بويىندا وتانسۇيگىشتىك، ەڭبەكقورلىق قاسيەتتەر، جاس ۇرپاق پەن اعا بۋىنعا قامقورلىق، جاسامپازدىق پەن قايىرىمدىلىق سياقتى رۋحاني ادامگەرشىلىك قۇندىلىقتار مەن ومىرلىك باعدارلار وتباسىندا قالىپتاسادى.

 ءاربىر وتباسى ەلىمىزدىڭ اسقاق ماقساتىنا جەتىپ، بولاشاعى ءبىرتۇتاس «ماڭگىلىك ەل» بولۋ جولىندا نىعايا تۇسىنۋىنە ولشەۋسىز ۇلەس قوسۋدا. تەك بەرىك وتباسىلىق داستۇرلەرى ورنىققان ەل عانا مىعىم ءارى مىزعىماس مەملەكەت بولادى. بۇگىنگى مەرەيلى كۇندە ادال ەڭبەگى، ىزگى سەزىم، يگى داستۇرلەر مەن سىيلاستىق سالتانات قۇرعان بارلىق شاڭىراق يەلەرىنە ريزاشىلىق بىلدىرەمىن. بارشاڭىزعا زور دەنساۋلىق، بەرەكە- بىرلىك، جاقسىلىق تىلەيمىن. شاڭىراقتارىڭىزدا تۇسىنىستىك، تاتۋلىق پەن مولشىلىق سالتانات قۇرسىن!» ، - دەلىنگەن ەلباسى قۇتتىقتاۋىندا.

 

اۆتور: مارلان جيەمباي