ەلباسى ب. ساعىنتايەۆ باسشىلىق ەتەتىن ۇكىمەتتەن بارلىق باعىت بويىنشا ناقتى، ساۋاتتى جۇمىستى تالاپ ەتتى

استانا. قازاقپارات - قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ پارلامەنت ءماجىلىسىنىڭ جالپى وتىرىسىنا قاتىستى، دەپ حابارلايدى اقوردانىڭ باسپا ءسوز قىزمەتى.

وتىرىس بارىسىندا مەملەكەت باسشىسى پرەمەر- مينيستر ك. ءماسىموۆ باستاعان ۇكىمەتتىڭ وتستاۆكاسىن قابىل العانىن تاعى دا اتاپ ءوتتى.

سونداي- اق، نۇرسۇلتان نازاربايەۆ ك. ماسىموۆكە جانە ۇكىمەت مۇشەلەرىنە اتقارعان جۇمىستارى ءۇشىن العىس ايتىپ، قىزمەتتەرىندەگى كۇردەلى كەزەڭگە قاراماستان العا قويىلعان بارلىق مىندەتتەردىڭ ورىندالعانىن ايتتى.

كونستيتۋتسيانىڭ 44-بابىنا سايكەس، ەلباسى پارلامەنت ءماجىلىسىنىڭ قاراۋىنا قازاقستان رەسپۋبليكاسى پرەمەر- ءمينيسترى لاۋازىمىنا باقىتجان ساعىنتايەۆتىڭ كانديداتۋراسىن ۇسىندى.

- وبلىستاردىڭ، استانا مەن الماتى قالالارى اكىمدەرىنىڭ قاتىسۋىمەن وتكەن ۇكىمەتتىڭ بۇگىنگى كەڭەيتىلگەن وتىرىسىندا جاڭا مينيسترلەر كابينەتى شەشۋگە ءتيىستى ءبىرقاتار جاڭا مىندەتتەر قويدىم. الەمدىك ەكونوميكا مەن ساياساتتىڭ قازىرگى تۇراقسىزدىعى جاعدايىندا ستراتەگيالىق باعدارلامالارىمىزدى ىسكە اسىرۋدى جالعاستىرۋ ماڭىزدى. ۇكىمەتتەن بارلىق باعىت بويىنشا ناقتى، ساۋاتتى جۇمىس تالاپ ەتىلەدى. باقىتجان ساعىنتايەۆ جاڭا ۇكىمەت جۇمىسىنىڭ ساباقتاستىعى مەن تيىمدىلىگىن ساقتاۋ ءۇشىن لايىقتى كانديداتۋرا دەپ ويلايمىن، - دەدى نۇرسۇلتان نازاربايەۆ.

ءماجىلىس دەپۋتاتتارى پرەمەر- مينيستر لاۋازىمىنا ۇسىنىلعان ب. ساعىنتايەۆتىڭ كانديداتۋراسىن ءبىراۋىزدان ماقۇلدادى.

ب. ساعىنتايەۆ كورسەتىلگەن سەنىم ءۇشىن العىس ءبىلدىرىپ، جۇكتەلگەن مىندەتتەردى ورىنداۋعا بار كۇش- جىگەرى مەن ءبىلىمىن جۇمسايتىنىن ايتتى.