كۇردەلى كەزەڭدەگى ۇكىمەتتىڭ باستى مىندەتى - قازاقستاندىقتاردىڭ ءومىر ساپاسىن تومەندەتپەۋ - ەلباسى
بۇگىن اقوردادا ءوتىپ جاتقان ۇكىمەتتىڭ كەڭەيتىلگەن وتىرىسىندا ق ر پرەزيدەنتى نۇرسۇلتان نازاربايەۆ وسىلاي ءمالىم ەتتى.
«قازىرگى جاعدايدا ەكونوميكالىق الەمدىك احۋال جاقساراتىنى كۇتىلىپ وتىرعان جوق. ەۋروپاداعى دا، رەسەيدەگى دە، توڭىرەگىمىزدەگى بارلىق جاعداي بىزگە ىقپال ەتپەي قويمايدى. دەگەنمەن، سوعان قاراماي، بۇعان دەيىن جالپى قازاقستاندىقتاردىڭ ءومىر ساپاسىن تومەندەتپەۋگە قاتىستى شارالار اتقارىپ كەلەمىز. بۇل باعىت جالعاسۋى ءتيىس. ەندىگى مىندەت - الەۋمەتتىك احۋالدى قاراپ، الداعى ۋاقىتتا نە ىستەۋ كەرەك، قانداي جاڭا شارالار قامتىلۋى تيىستىگىن قاراستىرامىز. سول ءۇشىن كەزدەسىپ وتىرمىز»، دەدى ۇكىمەتتىڭ كەڭەيتىلگەن وتىرىسىن اشقان پرەزيدەنت.
بۇل رەتتە ەلباسى بۇعان دەيىن قابىلدانعان جوسپارلارعا، الەمدىك احۋالعا، سونىڭ ىشىندە كومىرسۋتەك شيكىزاتىنىڭ الەمدىك باعاسىنداعى ماسەلەگە توقتالا كەلە، كوپتەگەن ەلدەر كۇردەلى كەزەڭدى باستان كەشىرىپ وتىرعانىن جەتكىزدى. الايدا، بۇعان قاراماستان قازاقستان ۇكىمەتى قيىننان جول تاۋىپ، حالىقتىڭ الەۋمەتتىك جاعدايىن تومەندەتپەۋگە جۇمىس ىستەۋى كەرەك. «حالىقارالىق ۆاليۋتا قورى مەن دۇنيەجۇزىلىك بانك الەمدىك ەكونوميكا ءۇش پايىزدىڭ توڭىرەگىندە عانا بولادى دەگەن بولجام جاساعانىن بىلەسىزدەر. مۇنىڭ ءبارى بىزگە تىكەلەي ىقپال ەتەدى. بۇگىنگى جيىندا قازىرگى ەكونوميكانىڭ احۋالى تۋرالى ۇلتتىق ەكونوميكا ءمينيسترى ق. بيشىمبايەۆ، قارجىلىق ساياسات جونىندە مينيستر ب. سۇلتانوۆ باياندايدى. ۇلتتىق بانكتىڭ ءتوراعاسى د. اقىشيەۆ قارجىلىق نەسيەلىك ساياسات تۋرالى باياندايتىن بولادى»، دەدى ن. نازاربايەۆ.
اۆتور: قانات مامەتقازى ۇلى
